سینیق کؤرپو

+0 به یه ن

آینا قاباغیندا ال-اوزومو یوماق ایسته ییردیم کی، بیردن، بدنیمه یامان اوشوتمه دوشدو. تیر-تیر تیتره دیم. آیاق اوستونده دورا بیلمه ییب، قصد ائله دیم، گئدم یاتاغیما گیرم. او حینده، گوزگویه باخیب وضعیتیمیده یوخلاماق ایسته دیم. آنجاق، اورادا باشقا بیریسینیده یانیمدا گؤردوم!! سولوما چؤنوب، هویوخ-هویوخ یانیمداکینا باخدیم. شککسیز، عزراییل جنابلاری ایدی! جان آلان، آرخایین-آرخایین ایشنی گؤرمک ایسته ییردی.

من جینقریمی چیخاردانماییب، حیات یولداشیمی سسله یه بیلمه دیم. بونونلا بئله، عزراییلا باخا-باخا بالاجا بالالاریم ذهنیمدن گئچدی و اوره گیمده، "من اؤلمک ایسته میرم!" دئدیم. ائله بیل او آندا، جان آلان منیم قلبیندن گئچنی ائشیدیب ایشیندن دایاندی. سونرادا منی بوشلاییب یوخ اولوب اورادان گئتدی. منده عزراییلین یاخشیلیغینا فیکیرلشه رک، آددیم-آددیم یاتاق اوتاغینا ساری یئریدیم.

نئچه ایلدی کی، هر گون بو جریانی خاطیرلاییب، "یاشاسین عزراییل!" دئییرم. اؤلنه جن ده دئیه جگم! بلکه، بئله جه عزراییلین یاخشیلیغیندان چیخا بیلم!