+0 به یه ن
بخته ورلر اؤلکه سی یئنه جومهور باشقانی سئچکیلرینه یاخینلاشیردی. بو اؤلکه ده نئچه ذادا چوخ-چوخ گوونیب اؤنم وئریردیلر، بیریده ائله بو دؤرد ایلدن بیر گئچیریلن سئچیملری ایدی. اورادا، سئچیملرینی دونیانین ان دئموکراتیک سئچکیلری بیلیردیلر. دئموکراسیلاریندان باشقا، اوجا یئرلره سانجیلمیش اوزون-اوزون بایراقلاریندان و اینسانلارینین هوشلو-باشلی اولدوقلارینداندا باشاردیقجا تعریفلر ائدیردیلر. اؤیونه-اؤیونه مئدیالاردان یاییردیلار، بوتون دونیا بیزیم اؤلکه ایله اینسانلاریمیزین حسرتینی چکیر! بیزده خئیلک بخته وریک کی بو تایسیز اؤلکه ده یاشاییریق!
او آخشام، اؤزه ل اؤلکه نین ان اوزون بایراغی دالغالانان گؤرکملی تپه نین اوستونده، جومهور باشقانلیغینا آدای اولما سوزجه گیندن گئچه بیلن کیمسه لرین موناظیره سی گئچیریلیردی. آدایلار، گئچمیش دؤنملر کیمی، جمال بی ایله کمال افندی ایدیلر. تیلویزیون گؤستریردی کی، جمال بی کمال افندینین تنقیدلرینه دؤزه بیلمه ییب، کوسه رک تپه آشاغیسینا یوللانیبدی. فرحله نمیش افندیده، "من ائله بئله یم!" دئیه-دئیه تپه باشیندا دوشونه دؤیوردو. تپه دوشنده کی قروووللار ایسه، دیشلرینی آغارداراق افندینی آلقیشلاییب، بیز کمالی ایسته ییریک والسلام دئییردیلر. آنجاق تپه اتیینده کیلر یامان چاش-باش قالمیشدیلار. بئله لیکله، هامی بو سفر کمال افندینین جومهور باشقانی سئچیله جه گینه و جمال بیین یئرینه گئچه جگینه اینانمیشدی.
بیر آز سونرا تپه آشاغیسیندا، اللری قابار چالمیش بیر کندلی، موناظیره دن چیخیب گئتمکده اولان، گؤزلری قیزارمیش جمالین قاباغینی کسیب، "جمال بی سن هارا گئدیرسن؟!!" دئیه دیللندی. جمالدا حیرصله دؤنه-دؤنه، "والله یالان دئییرلر!" دئدی. سونرادا قاشلارینی دویونله ییب، کیشیدن، "سنی من ایندییه جن گؤرمه میشم سن هله کیمسن؟!" دئیه سوردو. اللری قابارلی اوولده بیر آجی گولوش ائتدی. آردینجادا سؤیله دی: "سنه بوگون یالان دئسه لر جمال بی، بیزلره یوز ایلدی یالان دئییرلر!! عدالتدن دانیشیرلار، آنجاق بیز فقط ظولوم گؤروروک بوردا! زمیلریمیزین سویونو کسیب باشقا یئرلره آپاریرلار! مییوه لی آغاجلاریمیزی دریب آپاریرلار! اؤزوموزو قویمورلار یوردوموزدا آغاج اکک، اؤزلریده اکمیرلر! دئییرلر آغاجی گره ک بیز گؤرسدن باغدا اکه سیز، بوردا اولماز!! جمال بی دئمک اولار، بو اؤلکه ده بیزیم هر ذادیمیزا قیپ قویورلار!!" دئیینگن کندلی بیر آز ساکیت اولوب، آرتیردی: "تپه اتیینده اولانلار تپه اوستونده کیلردن داها چوخدولار جمال بی! بو اؤلکه ده بخته ور اولمویانلار بخته ور اولانلاردان قات-قات آرتیقدیلار کیشی!! سن گئدیب اوسته بیزلردن دانیشسان، رقیبی باغلایا بیلرسن! قئییت جمال بی گئد اوسته!!"
جمال بی ساققالینی تومارلایا-تومارلایا بیر آز فیکیرلشدی و دؤنوب ووقارلا اوسته گئتدی. موناظیره ده، عدالتدن، تبعیضلردن و بخته ور اولمایان کیمسه لردن سؤز آچاراق، ائله وارلیقلاری دانماغا چالیشان رقیبینی برک-برک باغلادی! بئله لیکله، اؤلکه تازادان جمالین جومهور باشقانی سئچیله جه گینه ایناندی.
جمال بی، بخته ور اولمایانلارین رایینی ییغاراق یئنه جومهور باشقانی اولدو و نئچه گون اونون گؤزلرینین ایچیده گولدو! باشقان سالیب چیخدیقدا، کمال افندینی اؤزونه بیرینجی یاردیمجی سئچدی و شوعارلارینا عمل ائتمه گی مصلحت بیلمه دی! او، اللری قابار چالمیش کندلینی خاطیرلایاندا بئله دوشوندو: "بیزیم اؤلکه ده بخته ور اولمایانلارین بو گونه دوشمه لرینین گوناهی ائله اونلارین اؤزلرینده دی!!" ائله بیل، بخته ورلر اؤلکه سینین بخته ور اولمایانلاری، دؤرد ایل داها دورومون ده ییشیلمه سینی گؤزله مه لی اولدولار.