قاتیللر

+0 به یه ن

نعمت جانان زاده نین تک اوشاغی اولان یوسوفو، تهران یولوندا اؤلدورموشدولر. پولیس پالتاری گئیمیش ایکی کیشی مییانا طرفلرینده، یوسوفون آراباسینی ساخلادیب، پئژوسوندان اندیریب کلله سیندن ووراراق قارنینی پیچاقلامیشدیلار. آردینجادا یوبانمادان ماشینی گؤتوروب، سوروب آرادان چیخمیشدیلار. اورتا یاشا نعمت ائله او گونده تبریزین پولیس ایداره سینه گئدیب، آغلایاراق جریانلاری باشدان آیاغا ایضاحلامیشدی. هابئله، گره کن بلگه لری گتیریب، گؤستریلن کاغاذلارا قول قویموشدو. او خبرلشمک اوچونده، ائو تیلفونلاریلا موبایل نومره لرینی پولیسه وئرمیشدی. اوره گی یارالی آتا، اوندان سونرا ائولرینه دؤنوب، هر آن یوسوفون قاتیللرینین یاخالانماسینی گؤزله میشدی.

نعمت، گئجه-گوندوز نیشانلی اوغلونون قاتیللرینین توتولماسینی اولو تانریدان دیله ییردی. ائوینده ده، ایش یئرینده ده فیکری-ذیکری یالنیز قاتیللر ایدی. آروادی مریمین ایسه حالی اریندان یامان ایدی. مریم اللرینی گؤیه گؤتوروب قاتیللره باشاردیقجا قارغیش ائدیردی. سونرا آغلاییب آغلاییب دیبده هوشدن گئدیردی.

بیر گون، یوسوفون پئژوسونون داغیلمیشی ائله مییانا یاخینلیقلاریندا تاپیلدی، آمما آدام اؤلدورنلردن هله ده بیر ایز یوخ ایدی! بو اولایدان سونرا  نعمت تئز-تئز پولیس ایداره سینه آیاق دؤیوب، قاتیللردن خبر آختاریردی. پولیس ایداره سینده هر سفر سرهنگ بالا مرتبه نین یانینا گئدیردی. سرهنگده چالیشمادا اولدوقلارینی بیلدیریب، بئله بیر ایشین دولاشیق سوره جی اولماسیندان صؤحبت ائدیردی. هر حالدا، آتانی اومودسوز یولا سالمیردی.

بئله جه نئچه آی گئچدی و نهایت نعمت پولیس ایداره سینه گئتمکدن یورولدو. داها او ایداره ده کیشینی اوولکی کیمی تحویل آلمیردیلار. حتی قویموردولار سرهنگ ایله گئدیب دانیشسین. بونلارا باخمایاراق، دوز-عمللی اؤز ایشینه گئتمه ین نعمت همیشه پولیس ایداره سیندن آچیلاجاق اؤزه ل تیلفونو گؤزله مکده ایدی.

یوسوفون ایلی تازا سوووشموشدو کی، بیر گون سحر باشی نعمتگیلین ائولرینین زنگی وورولوب، پولیسین شوماره سی دوشدو! او حینده نعمت ایله مریمین اوره کلری چیرپینیب، ایکیسیده قاتیللرین تاپیلدیغینی دوشوندولر. نعمت اوولده اللرینی گؤیه قالدیریب اولو تانرییا شوکورلر ائتدی، آردینداندا ایضطرابلی-ایضطرابلی قولاقلیغی گؤتوردو. دانیشان سرهنگ بالا مرتبه ایدی. سرهنگ جنابلاری یوسوفون آتاسیندان سوروشدو: "آغای جانان زاده سلام،  نئجه سیز؟! ایستیردیم گؤرم اوغلوزون قاتیللریندن نه خبر؟! قاتیللری تاپدیز؟!" نعمت، گیجه لیب بئله بیر سورغویا جواب وئرمکده قالدی! بیلمه دی نه دئسین، نه دئمه سین! دیبده بیر تهر، "یوخ سرهنگ!!" دئدی. آردینداندا ساغ اوللاشدیلار. بیر ایلده اون ایلجن قوجالمیش یازیق آتا-آنا دوشونوردولر، پولیس بیر گون قاتیللری یاخالایاجاق، بونلاردا یوسوفون قیصاصینی آلاجاقلار. آنجاق بو تیلفون اومودلارینا سون قویدو. اونلار سوروشوردولار، گؤره سن تبریز پولیسی بوتون قاتیللری بئله تاپارمی؟! و چاره سیزلیکدن ار-آرواد هم قاتیللره، همده پولیسه نیفرین ائله دیلر. 



  • [ ]