+0 به یه ن
یایین جوما گونونون آخشامی ساعات دؤرد یاریمدا، ارسلان آتاسینین کؤهنه پئیکانینی ایشله دیب، سوروب اهر شهرینی چیخدی. سونرا، تبریزه دوغرو یولا دوشدو. اهر-تبریز مسافتی 120 کیلومئتیردن آزدی و جادده ده بیر اولای باش وئرمه سه، بو یولو ایکی ساعاتا یاخین گئتمک اولار. یوخسا، ساعاتلار آرتیق اوزونا چکه بیلر! اون ایله یاخین دیر، سوروملولار تبریز-اهر اوتویولونون حاضیرلانماسینا سؤز وئریبلر، آنجاق بورا کیمی سؤزلرینه عمل ائتمه ییبلر! ایلده یوزلر موسافیر بو خطرلی و ایستاندارد اولمویان جادده ده جانلارینی الدن وئریرلر، آمما اوتویولون قورتولماسیندان هله ده دوزگون بیر خبر یوخدور! بؤلگه نین گل-گئتلی جادده لریندن بیری اولان بو جادده، هر تعطیل گونو آخشامی کیمی او گونده شولوق ایدی. نییه کی، بؤیوک تبریز شهری طرفلریندن، کلیبر، اهر و باشقا یئرلره گزمگه گئدنلر ائولرینه او یولدان قاییتماقدایدیلار. تبریز طرفینه گئدنلره قوشولموش، اهرلی ارسلان قارشیداکی گؤیجه بئل گدیگینه ساری سوردو و ساعات بئش اولمامیش، او اوجا گدیگین باشینا چاتدی. بو گدیگی اون ایللردی سهمانلاناغا چالیشیرلار، آنجاق هاچان گلنده یول دوزلدن بؤیوک ماشینلاری اورالاردا گؤرمک اولور! ایرمی یاشلی جوان سوروجو، اوجا گدیگی آرام-آرام آشدی. آردیندان آرانداکی دوز جادده ده سورمگه باشلادی. بوغونو-ساققالینی اوتموش، تئللرینی یاغلاییب دارامیش، آغ پالتار گئیمیش، قاراشین اوغلان، ساعات یئددیده باشلاناجاق یولداشینین توی مجلیسینه یئتیشمگی هدفله ییردی. ماشین سوره-سوره ده تورکیه خواننده لری اثرلریندن اولوشان بیر ناوارا دویغولاناراق قولاق آسماقدایدی.
تابلولار یاسال هیزین اورالاردا نهایت 100 اولدوغونو گؤستریرکن، جوان سوروجوده 90 ایله 100 سورعتلری آراسیندا سورمگه چالیشدی. جوان بو تهر سوره-سوره نئچه ماشیندان قاباغا گئچدی، آمما یاساق سورعته یاخین گئتمگینه باخمایاراق، ویژ-ویژ گلیب اونو آرخادا قویان یوخاری مودئل ماشینلاری دالبادال گؤردو! هر حالدا، ایرمی دقیقه جن قاباقکی سایاق سوردو. آنجاق ناوار یئتیشیب، "باس قازا عاشقیم باس قازا!" ماهنیسینی اوخوماغا باشلایارکن، بو اوخوماغی چوخ-چوخ سئون جوان، ال آپاریب دستگاهین سسینی اوجالتدی و هیجانلاناراق قاز پیدالینا باسدی! آپاریب یاسال هیزی آشیریب 110 سورعتینه یاخین سوردو. فرحله نرک، نئچه-نئچه آغیر-یونگول آرابانی قاباقلادی. بونونلا بئله، دالیدان گلیب اونو توولا سوووشان گؤرکملی آرابالارا یئنه ده تانیق اولدو! ارسلان بئله جه اون-اون بئش دقیقه حودودوندا 90 ایله 110 آراسیندا سوروب، مراسیمه واختیندا یئتیشه جگینه ایناندی. یاخشی هله قارشیدان گلن ماشین آز ایدی و سیبقت آلاندا چوخ چتینلیک چکمیردی.
دوز جادده نین آخیرلارینا یاخین، هریس یولو آغزینا یئتیشمه میش، ارسلان، بیردن-بیره پولیسین ماشینلارا نظارت ائتدیگینی گؤردو. بیر پولیس، بیرده پارک ائتمیش آغ پولیس آراباسینی اوزاقدان سئچینجه، تلم-تله سیک هیزینی خئیلک آزالتدی. بونونلا بئله آغ پئیکان یاخینلاشاندا، جادده قیراغیندا دوران پولیس، الینده کی "دایان" علامتینی اونا طرف قووزادی! او آندا سوروجونون اوره گی قیژ گئتدی و اوزوله رک آراباسینی آز قاباقلیقدا قیراغا چکیب، پارک ائتدی. وای ده ده ایندی نئچه جریمه یازاجاق، کول اولسون منیم باشیما دئدی. ارسلان یئنمه میش گوزگوده گؤردو کی، اونون همن آردینجا بیر قیرمیزی ماکسیمادا کنارا وئریب دالیسیندا ساخلادی. هر حالدا، گره کن بلگه لری حاضیرلاییب یئره دوشدو. سونرا پولیسله یوخاری مودئل پولیس آراباسینا ساری یئریمک ایسته دی، آنجاق بیر آز دایانیب پولیسلره ساری باخدی. پولیس آراباسیندا بیر نفر گؤزلوکلو مامور اوتورموشدو، آنجاق نم-نییه نه گؤزلوکلو و نه ده یئرده کی هئچ بیری اونونلا ماراقلانمیردیلار!؟ سورونمه گه چالیشان ارسلانین او چاغدا دولاشیق فیکیرلر بئیینینه دولدو. گؤردو، ائشیکده کی جوان پولیس گئدیب ایچریده کی اورتا یاش پولیسله مشورت ائتدی. و اونون ایظطیرابی داهادا چوخالدی. ماکسیما شوفئری ائشیکده کینین ایشاره سیله، گئچیب اؤز بلگه لرینی ایچره ده کی پولیسه وئردی. پولیس ایسه، ماکسیما شوفئریله حؤرمتله داورانیب جریمه پیتیگینی یازدی. اودا اعتیراض ائتمه دن پیتیک ایله بلگه لرینی آلیب، یولا دوشدو. جوان پولیس، علامتی قووزاییب بیر گوموش رنگلی زانتیایا توتوب اونودا ساخلاتدیردی و اونادا ایشارتلر ائتدی. آنجاق یئنه پئیکان شوفئرینه محل قویان یوخ ایدی! بئله جه، شوفئر یاواشجا اورادان اکیلمک ایسته دی!! آمما پولیسین آرخاسینا دوشمه سیندن، هابئله جریمه سینین آغیرلاشماسیندان قورخدو. نهایت، دوموک اولان جوان پولیسه یاخینلاشیب سلام وئریب قورخا-قورخا دئدی: "قارداش منیده ساخلادین آخی!؟" پولیس ایسه ایشیندن دایانیب نئچه لحظه باشدان آیاغا، گئیینمیش، تر باسمیش ارسلانا باخدی. آردینجادا گولومسه یه رک دئدی: "اولان من علامتی ماکسیمایا قووزادیم سنه یوخ!! منده دئییرم بس سنین آیری ایشین وار چکدین ساخلادین!!" سئوینن ارسلان دؤنمک ایسته ینده، پولیس یاواشجا سؤیله دی: "سن نئچه ایله گئده بیلسن، گئت! دایانیب بیزلری معطل ائله مه!!" ارسلان نئچه لحظه دوروخدو و پولیسه بیر سؤز دئمه دن تله سیک آراباسینا دؤندو. بیلمه دی پولیس دوغروسونو دئییردی، یوخسا شوخلوق ائدیردی. بلکه ده اهرلی اولدوغونو آنلاییب او تهر چیخ گئت دئدی. هر حالدا گئجیکمیش جوان، مومکون اولان سورعتلرله، انسیز و آسفالتی قولای اولان جادده ده قاباغا گئتمگه چالیشدی. دار جادده ده تئز-تئز گل-گئتلر آهسته لشیردی، سونرادا تازادان یول آچیلیردی. یاخشی هله یولدا چارپیشما گؤرونموردو، یوخسا آغیر تیخاج یاراناردی.
انسیز جادده قورتولاندا ساعات آلتی ایدی و ارسلان آز قالیردی خوجایا یئتیشسین. همیشه خوجادان تبریزه کیمی داهادا آرتیق قالابالیق اولار. چونکو ورزیقان طرفیندن گلنلرله اهردن گلنلره بیر-بیرلرینه قاریشارلار. تکجه تبریزه یئتیشمه گی هدفله ین ارسلان، ورزیقان یولو آغیزینا یاخینلاشاندا، اؤنونو آچیق گؤره رک هیزلا سوروردو. عین زاماندا، ورزیقانا دؤنمک ایسته ین نئچه ماشین یولون اورتاسیناجان گلیب دایانمیشدیلار و صبیرسیزلیکله اهردن گلن آرابالارین آرا وئرمه لرینی گودوردولر. آنجاق بیردن، گؤزلنیلمزدن، اونلارین بیری ارسلانین یولونو کسیب توولا ورزیقان جادده سینه گئچدی. او پئژونون آرادان سوووشماسینی پئیکان شوفئری چوخ-چوخ گئج آنلادی. بیر لحظه ده پئژو یولو آدداییب ورزیقانا طرف گئتدی، آمما فرمانینی سولا آلان ارسلان آراباسینی کونترول ائده بیلمه ییب اولدوقجا شیددتلی اورتاداکی جدوللره چیرپدی و همن آردینجادا نئچه دفعه او یان-بو یان اولدو. دیبده جادده ده دایاندی! آر-آردا مؤحکم-مؤحکم تورموزلار اولوندو! هارایلار یوکسلدی. باشیندان قان آخان و آغ پالتارلاری آل قانا بولاشمیش جوان، آتاسینین داغیلمیش پئیکانینین ایچینده قالدی. جادده ده آغیر تیغاج یارانیب یوللار قاپاندی. دؤرد یاندان موسافیرلر ماشینلاریندان انیب اولای یئرینه گلیب، موبایللاریلا اولایدان عکس ایله فیلم گؤتورمه گه باشلادیلار. بعضیلریده، یوبانمادان آجی اولایین گؤرونتولرینی تئلگراملا بؤلگه و دونیایا یایدیلار.
آز سونرا، اولای یئرینه یاخین، ماشینلاریندان انمیش ایکی سوروجو بیر-بیرلریله دانیشیردیلار.
- پئیکان شوفئری اؤلمویئیدی باری!!
- اینشاء آلله کی اؤلمز!!
- اولان گونده ائله بو جادده ده تصادوف اولور! کئشکم تبریز-اهر اوتوبانی تئزلیکله قورتولئیدی!
- ورزیقان طرفینه گئچمه گه بوردا بیر کؤرپو لازیمدی! فرعی یوللارین کؤرپوسو اولسا، بئله تصادوفلر اولماز! آنجاق قره داغ یوللارینین چوخو ائله بو جور آدام اؤلدورندیلر!!
- آذربایجان منطقه سینین هامیسی ائله بئله دی!! آنجاق شوفئرلرده اصلا گؤزله میرلر! گئچن هفته بیر تیرافیک یارانمیشدی کی، گل گؤره سن! بیر آز قاباغا گئتمگه خاطیر ماشینلار گئدیب دوشوردولر توپراقلارا! گئچیردیلر داغلارا-دره لره!! پولیسده خوجادان او طرفه هامینی گئجه یاریسیناجان ساخلاتدیرمیش، چوخ یاواش-یاواش یول وئریردی! ائله بیل ایسته ییردی مخلوغو ادب ائله سین!! او گون بیز آخشام اهردن چیخمیشدیق، آلتی ساعات سونرا گئجه یاریسی تبریزه یئتیشدیک!
- بوگون گؤره سن هاواختاجان، یول باغلی قالاجاق؟! هاواخت تبریزه یئتیشه جه ییک؟!
- بو جادده دن گلیب گئدنلرینکی قالیب آللاها، بللی اولماز!!
ساعات آلتی یاریمی سوووشموشدو کی، پولیس آراباسی اولای یئرینه چاتدی. بیر آز سونرا آمبولانسدا اؤزونو یئتیردی. بیر گؤزلوکلو پولیس آرابادان دوشوب حادیثه نی آراشدیردی و اونون سببینی پئیکانین آشیری هیزی یازدی. آمبولانس ایسه، اؤزه ل سسینی سالا-سالا، سون نفسلرینی چکن جوانی تبریزه گؤتوردو.