+0 به یه ن
پاییزین سون آیینین اورتا گونلرینین بیری ایدی. بئش مرتبه لی ایداره نین ایکینجی طبقه سینین اوتاقلارینین بیرینده، ایشچی سحر باشیندان ماساسی آرخاسیندا اوتوروب، گونده کیمی اؤنونده کی بیلگی سایاردا دوموک ایدی. حسن، کامپیوترین ساعاتی 11-ی سوووشدوقدا، گئچن گونلر کیمی اینترنت اکسپلورری ایجرا ائدیب، قولانیجی آدیلا رمزینی ووروب اینترنتی آچدی. مرکزدن یؤنتیلن، ارز مظننه سی یایان سایتلارین بعضیسینه باش چکه رک، دولارین یئنیلنمیش قیمتیندن خبر تاپدی. آردینجا، قارشیندا اوتوران اوتاقداشینی خیطاب ائدیب، کدرلی-کدرلی یابانجی پارالارین باهالاشماسیندان گیلئیلندی. حسنه تای کامپیوترینده مشغول اولان قاراشین تیمور، باشینی قووزاییب ایناملا سؤیله دی: "بئله گئتسه بیزیم آیلیقلاریمیز لاپ هئچ اولاجاقلار!! هر بیر شئی دولارلا باهالاشیر، آنجاق بیزیم آیلیغیمیز یوخ! بیزیمده کی گلیریمیز فقط آیلیغیمیزدی! بیز گونو-گوندن کاسیبلاییریق، فیشارلارادا بیز دوشه جه ییک! حسن منیم نظریمه بو چاغدا هر کیمین پولو اولسا گره ک تئزلیکله دولارا یادا قیزیلا چئویره!" حسن تیمورو حاقلایاراق سول الیله گؤزلوگونو دوزلدیب، یئنیدن گؤزلرینی مانیتورداکی قیمتلره زیلله دی. اونلارین باشقا ایکی اوتاقداشلاریدا وار ایدی، بیری حسنین ساغ طرفینده، بیریسیده تیمورون سول طرفینده اوتوروردو. آنجاق او چاغدا هئچ بیری یئرلرینده گؤرونموردولر. بیرده قئید ائتمک لازیمدیر کی، بو بؤیوک ایداره اون بئش آی قاباغاجان مرکزی دؤولته باغلی ایدی، آمما او زامانلاردان مرکزین بیر اؤزه ل شیرکتینه باغلانیرکن اؤزللشمیشدی. حسن اینترنتده گزه-گزه دئدی: "تیمور هم اوتاقلاریمیز چوخداندی اوتاقدان چیخیبلارها! گؤره سن هاردا قالیبلار؟!" تیمور گولومسه یرک جواب وئردی: "حتما ایندی ایداره نین هانسی اوتاغیندا دولاردان دانیشیرلار!! ایداره یوخ، تبریز یوخ، بلکه بیر اؤلکه بو گونلر دولارلا ماراقلی اولوب!" حسن بو سفر یاهومئیلینی یوخلاماغا باشلادی. نئچه تازا ایمئیل گؤزه چارپیردیلار. ایمئیللرین چوخودا دولارلا قیزیل آل-وئرینده چالیشان سایتلار طرفیندن گلمیشدیلر. آمما، حسنه بوگون چوخ غریبه بیر ایمئیلده یئتیشمیشدی! یوکسک لیسانسی اولاراق اورتا سویه ده انگیلیرجه بیلن حسن، بیلگی سایارداکی سؤزلوکدن فایدالاناراق، دیققتله ییغجام ایمئیلی اوخوماغا باشلاییب، قونوسوندان باش چیخارتماغا چالیشدی. یازیلمیشدی، بو ایمئیلین یییه سی بوروکسئلده گئچیرلن 1000000 دولارلیق لاتارینین اودوجوسو اولوبدور! اؤدولو الده ائتمک اوچونده، بانکلارین بیرینده حئساب آچمالی و اونون شوماره سی ایله مبلغینی، هابئله سیرالانمیش تانیتیم بلگه لری ایمئیلله گؤندرمه لیدیر. بوتون مدرکلری گؤندرمک اوچون ایکی هفته فورصتی وار، یوخسا اؤدول الدن چیخاجاقدیر. مکتوبون آخیرینادا لاتارینین سوروملوسو جورج تیلور قول قویموشدو. حسن، ایمئیلی ساکیت-ساکیت دؤنه-دؤنه اوخودو. سونرا یئریندن دوروب یاواش-یاواش ساغ طرفه ساری گئتدی. پنجره دن اوزاقلارا باخاراق بیر-ایکی دقیقه فیکیرلشدی. قاپییا ساری دؤنوب، اللرینی دالیسینا قویاراق، پنجره ایله قاپی آراسینداکی آلاندا قدم وورا-وورا مسئله نی سالیب چیخدی. دیبده، قونونو تیمورلا اورتایا قویماق ایسته دی. آنجاق باشقا اوتاقداشلاری قاپیدان گلیب، اودا یئرینده ایله شیرکن هله لیک تلسمه مه یینی دوشوندو. حسن نه قدر فیکیرلشیردی، ائله بیر لاتاریدا شیرکت ائله مه سی یادینا گلمیردی. او آرا-سیرا یابانجی سایتلارا باش چکیردی، آمما دئییلن لاتارینی هئچ خاطیرلامیردی. اؤزونو سورغولاییردی: "بس منیم ایمئیل آدرسیمی نه جور اله گتیریبلر اونلار!؟ بلکه من ائله شیرکت ائتدیگیمی اونوتموشام ائله!؟" حسن آرخایین اولسون دئیه، ائله او ساعات تیلور جنابلارینا دؤرد-بئش سطرلیک ساده بیر جواب یازیب، سوروملودان قونونو دوغرولاماسینی دیله دی. سوندادا مکتوبون "گؤندر" دوگمه سینی کلیک ائتدی. اؤنملی مکتوب حتما یئتیشسین دئیه، اونو بیر دفعه ده همن آداما گؤندردی. بئله گؤزلنیلمز یازیشمانین آردیندان، حسن یاریم ساعاتدان یاریم ساعاتا اینترنته باش ووروب، مئیلینده تیلورون یانیت مئساژینی یوخلادی. ساعات 15-ه جن، ایداره تعطیل اولان زامانا یاخین، یانیت آختارمانی دوام ائله دی، آنجاق گؤزله دیگینی گؤرمه دی.
حسن، قارا سامسونئت کیفی الینده اولاراق فیکیرلی-فیکیرلی ایداره دن چیخدی. گئدیب، پرایدینی ایشله دیب ایدراه نین پارکینگیندن چیخارتدی و 15دقیقه چکمه دن راهنماییدان یاغچیان شهرجیگینه چاتدی. موجتمعلرینه گلیب، پیلوتدا، آرابانی همیشه کی یئرینده پارک ائتدی. کیفینی گؤتوروب ماشیندان اندی. پیلله لرله اوول طبقه یه چیخیب، اؤز آپارتومانینا دوغرو یئریدی. اونون گلمه سینی پنجره ن گؤرموش، بالا قیزی آنالی قاپینی آچدی و آجیخمیش کیشی گونده کی کیمی آروادی فاطیمه نین میطباخدا ناهار حاضیرلاماسینی گؤردو. ایچری گیرنده ائله قوناق اوتاغی ایدی. ساغ طرفه گئدندن آتا-آنانین یاتاق اوتاغی و سول طرفده ده قیزلارین اوتاقلاری اولوردو. ... او هفته ایکیسی گئجه سی، حسن بؤیوک قیزی مارالین لپتابینی اوچ دفعه الینه آلیب، ائودن اینترنته گئده رک تیلورون یانیتینی آرادی. آمما بوروکسئلدن هئچ بیر خبر یوخ ایدی! کیشی، ائوده نه قدر عادی داورانماغا چالیشسادا، فاطیمه اونو گونده کیندن فرقلی گؤروب شام باشیندا سببینی سوروشدو. ارده بئله یانیتلادی: "ایداره ده بیر اهمیتلی ایشیم یارمچیلیق قالیب، فیکریم اونا گؤره مشغولدو!! ایشیمه گؤره بیر نفرین ایمئیلینیده گؤزله ییرم!" هر حالدا، حسن او گئجه یاتاغیندا اؤدوله گؤره جور به جور خیاللار ائدیب، سحره جن دوز-عمللی یاتا بیلمه دی.
حسن، هفته اوچو سحر تئزدن یئریندن دوروب ایشه گئتمگه حاضیرلاشیب، آپارتومانیندان چیخدی. تله سیک آراباسینا ساری گئتدی. ایشلتدیکدن سونرا، گوزگوده، تعججوبله گؤزلوگو گؤزونه تاخمادیغینی گؤردو! حسن، ایداره یه گئدندن بری ایلک دفعه اولاراق عینکسیز ائویندن چیخیبمیشدیغینی آنلادی!! ایشچی تازادان ائوه دؤنوب عینکینی گؤتوروب تاخدی. او بوگون گونده کیندن یاریم ساعات تئز ایداره یه طرف یولا دوشدو. ایشچی، ایش اوتاغینا یئتیریب، عجله ایله اؤز ماساسی آرخاسینا گئچیب کامپیوترینی ایشلتدی و ویندوز صفحه سی گلرکن، اینترنت اکسپلورری ایجرا ائدیب، رمزینی ووروب اینترنته گئتدی. او چاغدا اوتاقداشلارینین هئچ بیری هله گلمه میشدیلر. حسن، یاهومئیلینه گئدیب تیلورین یانیتینی گؤرونجه، هیجانلاناراق مکتوب اوستونده کلیک ائتدی، آردینجادا یازینی ایضطرابلی-ایضطرابلی اوخوماغا باشلادی. تیلورون جوابی لاپ ائله اولوملو ایدی! دئمک، حسن دوغرودان 1000000 دولار اؤدولو قازانمیشدیر! اؤدول اودوجوسو اولدوقجا هیجانلانیب، یئرینده اوتورا بیلمه دی. آیاغا قالخیب سئوینه-سئوینه ایکی-اوچ دقیقه او یانا-بو یانا یئریدی. سونرا پنجره قاباغیندا دایانیب، ائشیگه باخاراق یاخشی-یاخشی خیاللار ائتدی. آردیندان ماساسی آرخاسینا دؤنوب، بیلگی سایارین حئساب ماشینیندا اؤدول مبلغینی دونن دیرینه ضرب ائدیب تومنه چئویردی! اونون گؤزلری بؤیویوب، آز قالدی آغزی اییله!! چونکو عاغیلا سیغمازجاسینا واریمی بیردن-بیره اون برابر آرتیردی! قوهوم-تانیشلاریندا بئله بیر پوللو آدام تانیمیردی. یوزلر نفر چالیشان ایدالرینده ده تکجه اوچ-دؤرد باش مودورلری ائله پوللو اولا بیلردیلر، قالانلاری یوخ! ایشچیلرین چوخونون تکجه بیر آپارتومانی وار ایدی، اونودا بانکلاردان وام گؤتوره رک مین موصیبتله آلمیشدیلار. بونون اوچونده بو آی باشی گودن اینسانلار همیشه شوکرلرلر ائدیردیلر! چونکو ائوسیز اولاراق ایجاره اوتورماق شولوغ تبریزده چوخ آغیر وضعیت ایدی. بونونلا بئله ایشچیلر اینانمیشدیلار، وام گؤتورمه دن هئچ بیر ایشچی نه ائو آلا بیلر، نه ده ائوینی ده ییشدیره بیلر! قیرخ ایکی یاشلی، ایکی اوشاغی اولان حسنده، سکگیز ایل ایدی کی، ایکی اوتاقلی، یوز مئتیرجه ساحه سی اولان بیر آپارتوماندا یاشاییردی. او، مسکن بانکیندا پول یاتیرتمیشدی و ایسته ییردی اوول فورصتده وام گؤتوروب، ایندیکی ائوینی ساتدیقدان سونرا، بیر آز گئنیش اولان اوچ اوتاقلی بیر آپارتومان آلسین! ایسته ییردی، آلدیغی آپارتومان داها موجتمعده اولماسین!! نییه کی، دؤولت مامورلاری اوچ دؤنه موجتمعلرینه تؤکولوب بوتون اویدو بوشقابلارینی داملاردان آپارمیشدیلار! دیبده ده حسن باشقالارینا تای مجبور اولموشدو، بوشقابی قویسون بالا بالکونونا! بیرده ایسته میردی، پیلوت اوستو، قوزئی طرف و اوول طبقه اولماسین! چونکو بو وضعیتده اولان ایندیکی آپارتومانی قیشدا برک-برک سویوخ اولوردو. بونگاهلارا باش ووراندا، بونو ساتیب اونو آلماق اوچون 60 میلیون تومن پولونون آز اولدوغونو گؤروردو. آنجاق، دئیه سن اؤدول ایشچینین یاشاییشینین دؤنوش نوقطه سی اولاجاق ایدی! هر نه ایسه، حسنین اوتاقداشلاری واختیندا گلیب، اونو تکلیکدن چیخاردیب، فیکیرلریندن بیر آز آییردیلار.
ایرمی ایل سابیقه سی اولان حسن بوراجان دولار آل-وئرینه گیریشمه میشدی، بونونلا بئله بو باره ده بئش یاش اوندان بؤیوک و سابیقه لی اولان تیموردان گره کن بیلگیلری آلا بیلردی. حسن، او گون اؤدولو قونوسونو هی اندردی، هی دؤندردی. نهایتده، ائوینه گئتمه میشدن قاباق تیمورو بیر قیراغا چاغیریب، قونونو اونو آچیقلایاراق نظرینی سوروشدو. تیمور سؤیله دی: "گئت ائوده مشورت ائله، منیمده الیمدن بیر ایش گلسه اسیرگه مه رم! آنجاق پول الووا گلمه یینجه یقین ائله مه!!" حسن ائوینه گلیب، ناهار یئمه میشدن قاباق اؤنملی خبری یاواشجا فاطیمه یه ده دئدی و اونودا اؤزو کیمی چئشیدلی فیکیرلره سالدی. گئجه چاغی ایسه، نئچه یاخین آدامینا زنگ آچیب، مکتوبدان خبر وئره رک صلاح-مشورت ائتدی. بعضیلری، یوزه-یوزه اویدورمادیر و شییادلار سنین پوللارینی بیر تهر بانکدان چیخارتماق نییتینده دیرلر، دئدیلر! بعضیلریده، آییق-آییق گئت قاباغا گؤر نئجه اولور دئدیلر! ایکی گوروپدا دئدیکلرینه ائیشتدیکلریندن اؤرنکلر گتیردیلر. بئله لیکله، حسنین اؤدول خبری تئزلیکله هر یئره یاییلدی.
او گونلر، هم امکداشلاری، همده قوهوملاری حسنه داها آرتیق محببت ائدیردیلر. یاخینیندان سوووشان هر بیر تانیش، گولومسه یرک حالینی سوروشوردو. دوغرودان، حسن ائله بیل همن حسن دئییلدی!
ایکی گون فورصتی قالیردی کی، نهایت حسن یاشاییشینین ان چتین قرارینی وئردی. او گئجه تیلویزیون آچیق اولان قوناق اوتاغیندا، ار-آرواد بیر طرفده، قیزلاردا قارشی طرفده اوتورموشدولار. او چاغدا کیشی قرارینی دیققتله قولان آسان حیات یولداشینا آچیقلادی و هانسی یؤندملرله پوللو اولاجاقلارینی آیدینلاتدی. آنجاق بئله ایشلردن قورخان خانیم اؤزئت بیر جواب وئردی: "من سنه هئچ بیر سؤز دئمیرم!! آنجاق اؤز باشووادا بیر ایش گؤرمه، هر قدم گؤتورنده حتما یولداشلارووونان مشورت ائله!!" قادین بو سؤزو دئدیکده، دوروب قارشی طرفه گئچیب تیلویزیونا باخاراق فیکیرلره گئتدی. فاطیمه نین تک هدفی عاییله لرینین موتلو اولماسی ایدی، اودا پولسوز اولموردو! آرواد اون سکگیز ایل قاباقدان بو یانا، ائولیلیکدن بری، ارینین جیبینده دوز-عمللی بیر پارا اولدوغونو خاطیرلامیردی. اونون بیر دفعه ده بئله زیرکلیک ائده بیلمه سی یادینا گلمیردی! ایللر، هامیسی بیر-بیرینه اوخشار ایدی. تکجه، کیشینین تقویمی ایلده تازالانیردی! کیشی یئنی آلدیغی تقویمده اؤنملی شئیلری قئید ائدیردی. بونونلا بئله، بو تقویملرده قئید اولان خوشاگلیم خاطیره لر چوخ آز ایدیلار، آمما کیشینین اونا-بونا ضامین اولدوغو، جور به جو وام قیسطلارینین یئتیشمه لری، هابئله بیریندن بورج آلیب یادا بورج وئرمه تاریخلری، بول-بول گؤزه چارپیردیلار. کیشی، کؤهنه تقویملرین هئچ بیرینی او یانا آتماییب، هامیسینی ساغ-سالیم تقویم قوطوسوندا ساخلاییردی. تقویملردن علاوه، او قوطودا، "اوغلان ایسته ییرسینیز یا قیز؟" آدلی بیر کیتابیدا چوخدان بری گیزلدیردی! حسن مارال اولاندان دؤرد ایل سونرا ایدی کی، بیر باشقا اوشاغیدا عاییله یه آرتیرماق ایسته میشدی و بو سفر اوغلان دونیایا گلسین دئیه، او کیتابی آلمیشدیر! ار-آرواد کیتابی اوخویوب بیلگیلندیکدن سونرا، باشاردیقجا تلاشلارینی ائتمیشدیلر! بونا باخمایاراق آخیردا آنالی دوغولموشدور!! هر حالدا، حسن اوولدن بو کیتابی قیزلارین اوتاغینداکی کیتابخانالارینا قویماقدان چکینیردی! البتده، ایشچی آغا هئچ بیر کاغاذی ائشیگه آتمیردی، بیر گون درده ده یه بیلر دئیه چانتادا-کارتوندا ساخلاییردی. گونده لیک درده ده یه بیله جک شئیلریده سامسونئتینه ییغیردی. گئچمیشی بئله خاطیرلادیقدا، فاطیمه قیزلارینین درسلرینه یئتیشمگه باشلادی. حسن ایسه، گئچیب یاتاق اوتاغیندان کیملیک بلگه سیله بیر تعداد باشقا مدرکلری گتیریب کیفینه قویدو.
حسن، سحری سوروملوسونون اوتاغینا گئدیب ساعاتلیق مورخصلیک آلدی. سامسونئت کیفینی گؤتوروب ایداره دن ائشیگه یوللاندی. خییاوان قیراغیندا، ایلک گلن تاکسییا "آبرسان!" دئییب میندی. حسن، آبرسان یاخینلاریندا یئرلشن مسکن بانکینا گئدیب، مسکن وامی آلماق اوچون ایکی ایلدن بری بالا-بالا یاتیردیغی پوللاری، بیر یوللوق بانکدان چیخارتماق ایسته دی. بئله اولونجادا یوخاری ایمتییازی اولان حئسابی قاپانیردی، یالنیز آزجا فاییز وئریردیلر. ایسته دیگینی بانک ایشچیسینه سؤیله دیکده او دئدی کی، حئسابینی باغلاما، پولون فقط ایکی آیدا قالسا 20 میلیونا یاخین وام گؤتوره بیلرسن! حسن آنجاق بونا راضی اولمادی و بئله جه، 12 میلیون تومندن چوخ مبلغی اولان بانکلار آراسی بیر چکی، بانکدان آلیب سامسونئتینین زیپلی یئرینه قویدو. آلدیغی چکی ایداره لرینین یاخینیندا یئرلشن میللی بانکا آپاریب، آیلیغی تؤکولن جاری حئسابینا یاتیرتدی. بانکلاردا ایشلرینی گؤرن حسن، ساعات 10 حودودوندا ایش یئرینه قاییدیب، فیکرلی-فیکیرلی ایشینه مشغول اولدو. ساعات 11 اولاندا ایسه، اینترنته گئدیب دولارین بوگونکو مظننه سینی بیلیب، تیمورادا سؤیله دی. سونرا ایکیسیده گئیینیب حاضیرلاشدیلار.
سامسونئت گؤتورموش، قارا کاپشنلی، اورتا بوی حسن و قهوه ای خوت-شالوارلی، آلچاق بوی تیمور سوروملولاریندان مورخصلیک آلیب ایداره دن چیخدیلار. خییاوان قیراغینا گلیب، تاکسییا "دارایی آغیزی!" دئییب میندیلر. سؤزون دوغروسو، حسن بیر ساعات قاباق جاری حئسابینا یاتیردان تومنلری، دارایی آغیزی طرفلرینده آمریکا دولارینا تبدیل ائتمک ایسته ییردی. او چاغلار، دولارلا قیزیل گونده باهالاشیردیلار. قیزیل اؤزوده دولارین قیمتینین یوکسلمه سیندان دولایی اوسته گئدیردی. باشقا اؤلکه لرده دولارلا قیزیلین دیری بیر-بیرینین ترسینه اولوردو، آنجاق ندنسه بو اؤلکه ده ایکیسی بیرگه باهالاشیردیلار! باهالاشدیقدادا هله-هله یئنمیردیلر! حسنگیل یئتیشنده، دارایی آغزی قییملداییردی. دولارچیلار دایانمادان، "دولار! دولار!" سسله ییردیلر. اورالاردان گئچن هر کیمسه ده سانکی دولارلا ماراقلی ایدی! ائله بیل هامی ایسته ییردی، بیر-بیریندن پول قوپارتسین! هابئله، یاخینلارداکی صرافی توکانلاری دوپ-دولو ایدیلار. حسن ایله تیمور، اوزون ساچلی-اوزون پالتوولو، دووار دیبینده دایانان بیر دولارچینی ماراقلاناراق گؤردولر و مصلحتلشیب دولارچییا یاخینلاشدیلار. تیمور دولارین قیمتینی اوزون پالتوولو کیشیدن سوروشدو. کیشیده، "1420 تومن!" دئییب، بیر تیمور، بیرده حسنه باخا-باخا سؤیله دی: "قردش سیز داها بیرده بو قیمته دولار گؤره بیلمه سیز ها!! گلین سیزین هر نه قدر پولوز وار وئرین منه، منده 1420 تومندن سیزه دولار وئریم!" حسنگیل آنجاق او قیمتی یوخاری بیلیب، دولاری 1418 تومنه ایسته ییب، ایندی گلنده او قیمتده اولدوغونو وورغولادیلار. بئله لیکله دولارچییلا راضیلاشمادیقدا اوندان آیریلدیلار. هم دارایی آغزینداکی باشقا آل-وئرچیلر، همده صرافلار، اوزون پالتوولودان بیر آزدا یوخاری دئییردیلر. بو دورومدا تله سن ایشچیلر مشورت ائدیب، آل-وئر ائتمه دن فیکرلی-فیکیرلی ایداره لرینه دؤندولر. ایداره ده، اونلار تاسوفله نرک دولارین 1422-ا یوکسلدیگینه شاهید اولدولار.
آخشام باشی، حسن ایله تیمور قرارلاشیب یئنه درایی آغزینا گئتدیلر. اونلار سحرکی اوزون پالتوولونو اورالاردا آختاردیلار، آنجاق تاپا بیلمه دیلر. دارایی آغزی ایله صراف توکانلاری یئنه شولوغ ایدی، آمما سحرکی تکینده دئییلدی. خئیلک سورغو-جواب ائتدیکدن سونرا، اونلار ان آشاغی قیمت دئین صراف توکانینا گئچیب، 12 میلیون حودودوندا دولار ایسته دیکلرینی سؤیله دیلر و بیر آزدا چکیش-برکیش ائدیب، صرافی هر دولاری 1428تومندن حئسابلاماسینا راضی سالدیلار. صراف، حسنگیلین گؤزو اؤنونده رقملری اؤزونون حئساب ماشینینا سالدیقدا، پوللاریلا 8400 دولار آلا بیله جکلرینه وورغو یاپدی. سونرا حئساب ماشینین موشتریلره وئره رک، "اؤزوزده بیر حئسابلایین!" دئدی. صراف دولارلاری ساییب حاضیرلادی، آردینجادا موشتریلرین بانک کارتلارینی ایسته دی. او، حسنین میللی بانک کارتینی آلدیقدا کارت اوخویانینا چکدی و موشترینین حئسابیندان 12 میلیون تومنه یاخین اولان مبلغی اؤز حئسابینا گؤندریب، کارت اوخویاندا چاپ اولان، عملی گؤسترن پیتیکی کسدی. پیتیکی، سایدیغی 84 دانا 100 دولارلیغین اوستونه قویوب، بیرگه اونلارا تقدیم ائتدی. دولارلاری بیر دفعه تیمور سایدی، بیر دفعه ده حسن ساییب، سونرا دیرلی کاغاذلاری سامسونئتین زیپلی یئرینه یئرلشدیردی. موشتریلر، "ساغ اولون، اللریز آغریماسین!" دئییب توکاندان چیخاندا، صراف دئدی: "یئنه دولار لازیمیز اولسا، یئنه گلین اؤز توکانیزدی! بو وضعیتده آدام گره ک بوگونون ایشینی صاباحا قویمایا قالا! آرخایین اولون صاباح یئنه باهالاشاجاق، دولارین دایانماسی یوخدو!" گولومسه ین موشتریلر یئنه تشککور ائتدیلر. اونلار اوزاقلاشمامیش، صراف حسنی سسله ییب سامسونئتدن چوخ-چوخ برک یاپیشماغینین گره کلی اولدوغونو تاپیشیردی.
حسن راهنمایی طرفلرینده امکداشی تیموردان بوللو تشککور ائدیب ساغ اوللاشدی. دایانان یاغچیان تاکسیلارینا ساری گلیب، لاپ قاباقداکینا میندی. هاوا لاپ قارانلیقلاشمیشدی کی، کیشی سامسونئت کیفینی الینده سیخا-سیخا ائوه یئتیشیب زنگی باسدی. قاپینی آچان فاطیمه و قاباغینا قاچیب گلن قیزلاریلا سلاملاشیب کئف-احواللاشدی. سونرا بیر تیل اؤزونون یاتاق اوتاغینا گئتدی. قیزلار قوناق اوتاغیندا باخدیقلاری، اویدودان یاییملانان تورکیه فیلمینین آردینی توتارکن، فاطیمه ارینین دالیسیجا گئتدی. حسن، پالتارلارینی ده ییشیب، گئچیب تخت اوستونده اوتوردو. دولارلاری کیفدن چیخاردیب، بیر دؤنه ده سایدی. بیر دفعه ده موبایلینین حئساب ماشینیندا آل-وئری حئسابلاییب پیتیکله توتوشدوردو. سونرا دولارلاری حئیران-حئیران آیاق اوسته دایانیب اونو ایزله ین خانیما وئریب، "بیرده سن سای خانیم، من لاپ موطمئن اولوم هشتاد دؤرد دانادی!!" دئدی. خانیم سایدیقدا، "دوزدو!" دئدی. حسن دولارلاردان 200 دولار آییریب، سامسونئتین زیپلی یئرینه قویدو. سونرا آیاغا قالخیب، تخت یانینداکی بالاجا ماسانی گؤتوروب کومودون یانینا قویدو. آردیندان ماسانین اوزرینه چیخیب، کومودون یوخاری طبقه سینده یئر آلان تقویم قوطوسونو گؤتوردو و اونو ائهمال گتیریب تخت اوستونه قویدو. اوتوروب، 8200 دولار بسته سی ایله پیتیکی کاغاذلادی و قوطونو آچیب کاغاذلادیغینی تقویملرله کیتابین اورتاسیندا باسدیردی. دوروب قوطونو گؤتوروب، بو سفر یوخاری طبقه نین لاپ دیب طرفینه ایته له دی. یئره اندیکده، بو ایلین تقویمینی سامسونئتدن گؤتوروب، صرافین آدیلا نئچه دولار آلدیغینی اوندا قئید ائله دی. ایشی قورتولوب آیاغا قالخان کیشی، خانیما بیر سیرا توصیه لر ائتدی. سوندادا ایکیسی بیرگه قوناق اوتاغینا گلدیلر. او گئجه، اویدو کاناللاریندا دولارین اینانیلماز یوکسلمه سیندن دانیشیردیلار. حسن ایله فاطیمه ده صؤحبتلره دیققتله قولاق آسیردیلار.
صاباحیسی گون، حسن یئنه مورخصلیک آلدی. بو سفر گئدیب آبرسان طرفلرینده یئرلشن توسعه صادرات بانکیندا 200 دولار مبلغ ایله بیر ارزی حئساب آچدی. یوبانماداندا ایداره یه قاییتدی. ساعات 11-ده اینترنتده دولارین قیمتی تازالاناندا اولموشدو: 1435 تومن! حسنده ایلک دفعه اولاراق دولارین باهالاشماسینا خاطیر سئویندی! ناهاردان سونرا، اؤدول اودوجوسو تیلور ایسته میش بلگه لرین هامیسینی دیققتله حاضیرلاییب، لاتاری سوروملوسونا ایکی دفعه ایمئیل ائتدی. آردیندان، یئنه ده ساعاتدان ساعاتا اؤدولدن، هابئله دولارین باهالاشماسیندان خبر آرادی.
آی باشینا یاخین اولان، ایشچیلرین آیلیق فیشلری چاپ اولان گون، حسن اصلا آییلیغینین نئچه اولدوغونا باخمادی! چونکو نظرینه آییلیغی اولدوقجا دیرسیز ایدی!! او، ایداره ده ده-ائوده ده تکجه اؤدول ایله دولارا فیکیرلشیب خیاللارا گئدیردی. او گون حسن 1000000 دولار اؤدولو الینده حیسس ائدیب، شاه کئفی چکیردی! او گئجه ده تبریزین ولیعصر محلله سینده بیر گؤرکملی حیط آلیب یاشادیغینی یوخودا گؤروردو.
بلگه لری یوللایاندان بیر گون سونرا، تیلور جواب وئردی کی، سنین مدرکلرین بوتونلوکله تصدیق اولوندولار، آنجاق اؤدولو گؤندرمک اوچون، سن گره ک اوولده 100 دولار اولان هزینه سینی بیزیم قئید اولان حئسابیمیزا گؤنده ره سن! مکتوبدا دولارین گلمه سیندن یوخ، گئتمه سیندن سؤز اولماسینی گؤررکن، ایشچینین اوره گی یامان-یامان تیتره دی!! ائله بیل، بیردنده اونو گؤیدن یئره چیرپدیلار! نئچه لحظه دئدی بس، سکته ائله دی! هر حالدا، ایشه شک ائدن حسن چوخ-چوخ اوزگون اولاراق بیر-ایکی ساعات هئچ کیمه، هئچ بیر سؤز دئیه بیلمه دی. تئز-تئز آیاق اوسته دوروب باشینی آشاغی سالاراق، اوتاقدا او یانا-بو یانا گئتدی. هردنده اوتاقدان ائشیگه گئدیب فیکیرلشدی. دیبده، فیکیرلرینی توپارلاییب، تیلفون ائده رک یاخینلاریلا آرام-آرام مشورت ائتدی. بعضیلری دئدیلر، ائله بیر پول دئییل، اونو یوللا گؤر نئجه اولور! بعضیلریده دئدیلر، ائله 100 دولاری ایسته ییرلر الیندن چیخاردالار! قاللاشلار 1000 نفرین باشینا بئله بؤرک قویسالار گؤر نه قدر پول اولار!! سحردن ائشیگه گئتمیش تیمور اوتاغا قاییدیب مسئله نی آنلادیقدا، حسنه بیر آز توختاقلیق وئریب تاپیشیردی: "تیلورا یاز منیم ایجازه مله پوللاردان 100 دولار گؤتورون، قالانینی منه یوللایین!!" حسن ایسه، تیمورون فیکرینی عاغیللی بیلیب، او دئدیگی سایاق ناراحات-ناراحات بیر مکتوب داها یازدی. مکتوبون جوابیدا ائله او گون یئتیشدی. تیلور یازمیشدی، اؤدول بوتؤو اولدوقدا بیز اونو اصلا پارچالایا بیلمه ریک! سن تئزلیکله 100 دولاری گره ک یوللایاسان، یوخسا اودوجوسو اولماغین هئچ اولاجاق!! ... حسنین اوره گیندن گلمه دی او پولو گؤندرسین، بئله جه ده اؤدول مسئله سی یاواش-یاواش سون بولدو. هابئله، حسن گئدیب 200 دولارینی بانکدان چیخاردیب، گتیریب ائوینده کیلرین یانینا قویدو.
ائوینده دولار گیزله دن حسن، گونده قیمتدن خبرلر آختاریردی. باهالاشما گؤرنده، سئوینیب او قیمتله دولارلارینی حئسابلاییردی! ایکی ایل یاریم، حسن بو ایشلری دواملی اولاراق تیکرار ائتدی. بعضیلری دئییردیلر، دؤولت هر نفره آیدا وئردیگی 45500 تومنلیک یارانه نی داها یئتیره بیلمه ییر! باشقا گلیر یئریده یوخدور، مخلوغون یارانه سینی وئرمک اوچون، دولاری بئله جه باهالاداراق تومن ییغیر!! هاچان ایسته ییرسه ده، یئنه آزالدا بیلر! بعضیلرده دئییردیلر ایپ دؤولتین الیندن چوخدان چیخیب، دولارین قیمتی 10000 تومندن یوخاری قووزاناجاقدیر! او چاغلار، دولارین باهالاشماسینین قارشیسینی آلماق اوچون، دؤولت بعضی-بعضی سوموت قرارلار وئردی. ارز قیمتینی جانلی یایان سایتلاری فیلتر ائله دی! موجاز و غیر موجاز صرافلار سیرالادی. دولاری ائوده ساخلاماغی سوچ حئسابلاییب، اونو بانکلاردان چیخارتماغی یاساق ائتدی. موبادیله ای دولار یارادیب بعضیلرینه وئردی. دؤولت دئییردی، الینیزده کی دولارلاری ساتین بانکلارا، اؤزوده موبادیله ای قیمتله! اودا کی آزاد قیمتدن چوخ آشاغییا اولوردو!! بیرده کی، بانکلاردا موددتلی تومن ساخلامانین فاییزینی آرتیردی. دؤولت، باهالاشمانین اصلی سببی اولان آداملاری مرکزده یاخالامیشیق دئدی. آنجاق، بو ایشلر چوخ فایدا وئرمه ییب آزاد ارز چوخ واختلار باهالاشدی. حسن، دولارین 4000 تومنی گئچدیگینی گؤرنده، تیلورون دوغرودان اونا بیر جور اؤدول گؤندردیگینی دوشونوب اؤز-اؤزونه دئدی: "ایمئیل یاخشی واخت منی دبرتدی ها!! دولار 6000 تومنه یئتیشسه آپارتومانیمی ساتیب منطقه ده موجتمعده اولمایان اوچ اوتاقلی بیر آپارتومان آلارام! اؤزوده وام گؤتورمه دن، بورجا دوشمه دن! وام گؤتورسئیدیم 20 میلیونا 30 میلیوندان چوخ اؤده یه جک ایدیم، آیدادا آییلیغیمین اؤنملی دیرینی اون ایلدن چوخ وئره جک ایدیم!" حسن بیر طرفدنده قورخوردو، اوغرو گلیب دولارلارینی آپارا، هئچ بیر محکمه یه ده شیکایت ائده بیلمه ییب یارقیچی تاپیلمایا! چونکو بعضی زامانلار، دولاردان سؤز آچماق بئله یاساق کیمی ایدی. ایداره ده، داها کیمسه قدیم کیمی آشکارجاسینا دولاردان دانیشمیردی. حسنی امن-آمانلیغی پوزان تانیییب دوستاغا باسا بیلردیلر. ایشینیده الدن وئره بیلردی. حسن دیبده دولارلاردان یورولدو و ایسته ییردی، اونلاری ساتیب آپارتومان آلماغا گیریشه. تیمور، یئنه حسنین یاردیمینا گلیب، ایکیسی بو سفر دولارلاری آپاریب درایی آغزیندا ساتدیلار. هر دولاری 3280 تومنه و 27 میلیون تومندن چوخ اولدو!
آنجاق، آپارتومانین قیمتیده ترپنمیشدی! بونگاهلارا باش ووراندا، یاغچیاندا، مجتمعده اولمایان بیر بابت اوچ اوتاقلی آپارتومانین قیمتی لاپ آز 320 میلیون تومن ایدی. حسنین آپارتومانینادا 200 میلیونا ایسته ییردیلر. دئمک، لاپ آزی 120 میلیون تومن پولو گره ک اولایدی! دئدیلر، ایندی بانکلار یاخشی مسکن وامی وئریر، آپار الینده کی پوللاری بیر موددت بانکلاردا یاتیردیب وام گؤتور! حسن حئسابلایاندا، واملارین قیسطلاری اونون آلدیغی آیلیقدان آرتیق اولوردو!! اؤزللشمه دن سونرا، آیلیقلار ایلده فقط بایرامدا چوخالدیلار. دئمک، ایشچیلرین آیلیغی دولارلا قاباغا گئتمه ییب، ایلده فقط 12-10 فاییز آرتدی. هابئله، یارانه ده ییشیلمز قالدی. بئله لیکله، حسن داها بیر پول ییغانمادی. هر نه ایسه، حسن یا گره ک پوللارینی بانکا قویایدی، یادا گره ک آپارتومانین قاپی-پنجره سی ایله ایسیتمه سیستیمینه خرج قویوب اورادا قالیب گئچینئیدی. ائوده، فاطیمه هی اونو دانلاییب دئییردی: "کیشی عؤمروودا بیر دفعه ایسته دین زیرکلیک ائله یه سن، اودا بئله اولدو!!" ایداره ده، تیمور شوخلوقجاسینا سؤیله ییردی: "کارمند بیر شئیی آلا بیلسه، اوندا یعنی او شئی دیردن دوشوب!! سنین دولارلاریندا ائله اولدولار!!"