سینیق کؤرپو

+0 به یه ن

یئللی شهرده ندنسه داها یئل اسمیردی. شهر هاواسی گونلر چیرکلی اولوب ماوی بویالی گؤی گؤرولموردو. او چاغلار، حالیم یامان توتولوردو، اوره ییم برک-برک چیرپینیردی. دئییردیم بس تبریز بوغولور ایندیجه دی منده هوشدن گئدیب بوغولاجاغام. کدرلی وضعیت هی تیکرار اولدوقدا، اؤلمه میشدن قاباق وصییت نامه می حاضیرلاماق فیکیرینه دوشدوم. هابئله، اؤلندن سونرا لازیم اولاجاق بیلگیلری عاییله مله اورتادا قویدوم.

او گون سحر تئزدن ایداره یه گلمیشدیم و یئریمده وصییتیم حاقدا فیکیرلشیردیم. بو حینده اوتاقداشیم یئتیریب سلام-علیکدن سونرا اینانیلماز بیر خبر سؤیله دی. اینانا بیلمه دیم، هئچ اینانمالیدا دئییلدی! اوتاقداش اوزگون-اوزگون عظیم زاده جنابلارینین اوره یینین دایاندیغینی دئدی! من ایسه، نئچه ثانییه دونوخوب قالدیم، آردیندان اؤلومون سببینی سوروشدوم. اوتاقداش اولاییین نه تهر باش وئردییینی سؤیله مه یه باشلادی. دئییرلر، دونن گئجه فوتسال یاریشیندا حالی قاریشان عظیم زاده قیراغا چکیلیب، ائشیکده کیلرین بیریله ده ییشیلمه سینی ایستر، آمما قیراقدا اوتورار-اوتورماز یئره ییخیلار! زنگ وورورلار آمبولانس یئتیرر. آمبولانس عظیم زاده نی گؤتوروب بین المللی خسته خانایا آپارار. اورادا هوشه گتیرسه لرده مدنی خسته خاناسینا آپارماغی مصلحت بیلرلر. آمبولانسدا یئنه حالدان گئدر. آنجاق مدنیده تازادان هوشه گتیررلر. یولداشلادی گئجه یاریسی بیر یاریمدا اوندان آیریلارلار. عظیم زاده ایسه، گئجه نی سحره یئتیرمز!! دونن هاوا بتر کیرلی ایدی، دئییرلر سالونوندا هاواسی ائله ائشیک تکین ایدی. اونوندا ائتگیسی اولا بیلر. دوکتورلر بو کیرلی هاوالی شهرده قالماغی بئله مصلحت گؤرمورلر! عظیم زاده بیلدیر-اینیش ایل قلب عملی ائتمیشدی، بونونلا بئله یاریشا گئدیب اؤزوده بو هاوادا! هر حالدا، یازیق بئله جه دونیاسینی ده ییشیب!! بو سؤزلری ائشیتدیکده، دوروب بیر آز اویانا-بو یانا گئتدیم و آیاق اوسته عظیم زاده نین یاخشیلیقلاریندان اوتاقداشیما تعریفله دیم. اؤزه للیکله ده منه ائتدیگی محبتلری بیر-بیر آندیم. دونن هاوا چوخ کیرلی ایدی منده ائوده قالاراق هئچ بیر یئره گئتمه دیییمیده دئدیم. سونرا پنجره دن ائشیگه باخاراق، بوگون ائله بیل دوننکیندن بیر آز یاخشیدی سؤیله دیم. او گون، بیزیم اوتاغا گلن هر کیمسه تاسوفله نرک اوتاقداشیم دئدییینه اوخشار سؤزلری تیکرار ائله دی.

ساعات 12 –ده، عظیم زاده نین دفن تؤره نی گئچیریله جک ایدی. ساعات 5/11، ایکی کؤهنه اوتوبوس آرد-آردا ایداره نین حیطینه گلدیلر. بیری یاشیل، بیریده قیزمیزی ایدی. هره سی 30-20 بالا ماشینجان توستو ائشیگه اوتوروردو!! اوولده یاشیل دولدوردو، دالیسیجادا قیرمیزی میندیردی. من چیخیب قیزمیزینین آرخا صندللرینین بیرینده اوتوردوم. تئزلیکله اوتوبوسلارین ایکیسیده دولوب یاواش-یاواش یولا دوزلدیلر. یئرده قالان امکداشلاردا اؤز آرابالارینی سوراقلادیلار. اوتوبوسلار خییاوانلاردان سوووشوب، کسایی اوتوبانینا دوشدولر. ساغا دؤنوب وادی رحمته دوغرو گئتدیلر. بعضیلری دینمیردی، بعضیلریده یاواش-یاواش قونوشوردولار. من وصییتیمی بوس-بوتون اونوتموشدوم! ساکیت-ساکیت اوتوبوسدان سولدا اولان سهند داغلارینا طرف باخاراق عظیم زاده ایله بیر قیسمتده ایشله دیییم گونلری خاطیرلاییردیم. او زامانلار سوروملوم ایدی و رسمی ایشچی اولماغیمدا اونودولماز امکی گئچمیشدی. سونرالاردا، هر یئرده منیم ایشلریمدن مودافیعه ائتمیشدی. چیخاندان ایرمی دقیقه سونرا، اوتوبوسلار وادی رحمتین اوست گئچیت کؤرپوسو ایله سولا دؤنه رک داغ دوشونه گئچدیلر و چوخ چکمه دن قبیریستالیغا یئتیشدیلر. قادین اؤلولری یویولان دامین اؤنوندن سوووشوب، کیشیلر یویولان بینایا دوغرو گئتدیلر. مقصده یئتیشمه میش یارانان تیخاجدا، ایکی-اوچ دقیقه دایاندیلار. وادی رحمت همیشه کی کیمی شولوغ ایدی. سول طرفده عاییله لر اوچون قورولان قبیرلر گؤزه چارپیردی. خان کیشیزاده، مهندس خسروشاهی و باشقا سوی آدلاری داشییان بالاجا تیکینتیلر یان-یانا دوزولموشدولر. دیبده، آرابالار کیشی اؤلولری یویولان دامین قاباغیندا ساخلاییب، هامی بیر-بیر یئره اندیلر.

امکداشلار بیر موددت یاخینلاردا دایانمالی ایدیلار، چونکو یوماق اوچون اؤلولری صفه دوزموشدولر. عظیم زاده دن قاباق بیر باشقاسینین نامازینی دامدا قیلیب، "لا الاهه الا الله!" دئیه رک قویلاماغا آپاردیلار. آمما آدامین چوخ اولدوغونا گؤره عظیم زاده نین میییت نامازینی ائشیکده قیلماغا قرار وئردیلر. قبریستانلیق هاواسی شهر هاواسیندان چوخ تمیز ایدی! گونشلی بیر پاییز هاواسی ایدی. من دؤردونجو سیرادا یئر آلیب، اوجادان، "الله اکبر!" دئدیم. نامازدان سونرا، مهرداد عظیم زاده 99-ونجو بولوکدا قویلاناجاق دئیه سسله دیلر. آنجاق، "لا الاهه الا الله!"سؤیله یه رک چوخ یول گئتمه میشدیک کی، اؤلو گؤتورنلر دایانیب اؤلونو آرابایا قویدولار. بئله لیکله، امکداشلار عاییله قبیرلرینین او یانیندا یئرلشن 99 –ونجو بولوکا دوغرو یئریمه یه باشلادیلار. منده یوللاندیم. یولومدا بیر قیزین یانیخلی سسینی دینله دیم. دالبادال دئییردی: "نه قدر دئدیک سؤزه باخمادی کی!!" دؤنوب باخاندا، اوزوندن عظیم زاده نین قیزی اولاجاغینی دوشوندوم. ائله بیل گنج قیز آتاسینین قلب عملی اولا-اولا فوتسالا گئتمه ییندن گیلئیلنیردی. کؤیره لیب گؤزلریم یاشلاندی!

قادینلار آرالیدا دوروب، کیشلر غملی-غملی عظیم زاده نین قبیرینی دؤوره له میشکن، ماللا دوعالار اوخویوب، فاتیحه لر اوخوتدو. آردیندان، روضه اوخویان باشلادی. عظیم زاده نین گنج اوغلو ایله قارداشلاری آغلاماقدان آیاق اوسته دورا بیلمیردیلر. اونلارا گؤزوم دوشنده، منده قهرله نیردیم. ایداره میزین باشقانی، نئچه نفر چئوره سینی آلاراق ساکیت-ساکیت دورموشدو. تؤرن قورتولاندا، روضه اوخویان هامیدان اؤزه للیکله ده باشقانین آدینی چکه رک بوللو تشککور ائتدی. کیک، مییوه سویو و حالوا پایلاندی. کیشلر قبیر باشیندان داغیلیب، قادینلار ییغیلدی.

من، عظیم زاده یه آلله سنه رحمت ائله سین دئییب، اوزاقدان گؤرونن قیرمیزی اوتوبوسا دوغرو یئریدیم. خئیلک امکداش اؤز آرابالاریلا گلمیشدیلر. اورادان تبریزه باخاندا گؤردوم، شهری کول بویالی دومان آلیب!! شهرین اوستونه چیرکلی آغیر هاوا اوتورموشدو! وصییتیم یئنه یادیما دوشوب، فیکیرلشه-فیکیرلشه گلیب آرابایا چیخدیم. ائله بالا-بالا هر کیمده گلیب اؤز یئرینده ایلشدی. اوتوبوس قادینلارین گلمه یینی گؤزله ییردی، منده شهره باخا-باخا فیکیرلشیردیم. اؤز-اؤزومه دئییردم: "گؤره سن مسئوللار کی یقین تئز-تئز بو مراسیملرده ایشتیراک ائدیرلر، گلنده بورادان شهره باخیرلارمی!؟ گؤره سن اونلار مسئله نین حللینه فیکرلشیرلرمی؟! گؤره سن کیم راضیدیر، بیز بئله بیر چیرکین هاوا ایچینده آتدیم-آتدیم اؤلومه ساری گئده ک!؟ نییه بیزیم ساغلیغیمیز اؤنملی دئییل؟! ... نییه تبریزه بیر گون آغلایان یوخدور؟!"

اون بئش دقیقه سونرا، اوتوبوس گلدیگیمیز اوتوبانلا ایداره یه ساری یولا دوشدو. کئفسیز شهره باخا-باخا، وصییتیمده یازاجاق سؤزلریم آیدینلاشیب، جومله-جومله ذهنیمدن گئچدی: بو چیرکلی هاوادا هوشدن گئدرسم، قویون من اؤز ائویمده اؤلوم! خسته خانالارا گؤتوروب بیر-ایکی گون گئجیکدیرمه یین. جسدیمی گیزلیجه وادی رحمته گؤتورون و اورانین لاپ اوجوزلو قبیرلرینده باسدیرین. منیم دفن تؤره نیمه بیر نفرده قاتیلماسین. شام غریبان، اوچ، قیرخ و هئچ بیر آنما یاس تؤرنی منه توتمایین. مخلوغون گلمه مه یینله جهنم گئده جکمسه، قویون من جهنم اولوم!! ...