گول و قایا

+0 به یه ن

یازار: گولمیره راماضانقیزی (Gülmirə  RAMAZANQIZI)

کؤچورن: قدرت ابوالحسنی سهلان

 باهار گلمیشدی. داغ-دره، مئشه مین بیر رنگه بویانمیشدی. باغ-باغچادا عطیر ساچان گوللر-چیچکلر سئوگی نغمه سی اوخویان بولبوللره ناز ساتیردیلار. اوجا داغین قاشیندان آخان شلاله یاز گونشینین قیزیلی ذرره لریندن بیچیلمیش دوماغ کؤپوکلو دون گئیینمیشدی. شلاله چاغلایا-چاغلایا ائله بیل شعر اوخویوردو. خوش آوازی درین دره لره سیغیشمیردی. دنیزه جان آتان جوشقون داغ چایینا قووشان شلاله نین ده، کیچیک سیسقا بولاقلارین دا اورکلری ووصال سئوینجیندن آتیلیب-دوشوردو. 

چایین حزین زومزومه سی ده اونون ساحیلینده خالچا-پالاز یویان قیزلارین ماهنیلارینا، شاقراق گولوشلرینه قاریشمیشدی.

بئله بیر واختدا، طبیعتین سئویب-سئویلن چاغیندا داغ چایی دا قوینونا سیغینمیش نهنگ قایادا بیتن آل-قیرمیزی قیزیلگول کولونا عاشیق اولموشدو. نهنگ قایا چایی ایکی قولا آییریردی. گول کولو ائله بیل آنا طبیعتین بوتون قانونلارینی پوزاراق قایانین داش ووجودونا آل قیرمیزی بایراق کیمی سانجیلمیشدی. یازدا پارداخلانمیش گول کولو نهنگ قایانین عظمتینی داهادا آرتیرمیشدی.

داغ چایی گول کولونو نهنگ قایادان آیریب، دؤشونده قرار توتموش یامیاشیل تپه یه آپارماق ایسته ییردی. آمما نه قدر چارپینسا دا، قولو قایاداکی گول کولونا چاتا بیلمیردی. ... 

چایین باغریندان اینیلتی قوپدو. سولاری شاهه قالخدی. بو مقامدا ایکی قولونو وار قووه سیله بیرلشدیریب گور سئله چئویردی. سئل نهنگ قایانی موحاصیره یه آلدی. داغ چایی بؤیوک حمله ایله اؤزونو قایایا چیرپدی. و یاناغی، سانکی گؤز یاشیندان ایسلانمیش گول کولونو کؤکوندن قوپاریب سورعتله ایره لی-تپه یه ساری آپاردی. گور سئل توختاییب-چکیلدیکجه، جوشقون داغ چایینین سویو دورولوردو. دوردوقجا ساکیتلشیردی. آرتیق گول کولو دا  تپه نین باشینا قویولموش شاهلیق تاجینا بنزه ییردی.

داغ چایی اؤز قلبه سینه چوخ سئوینیردی. او هی گول کولونو عزیزله ییردی. گول کولو ایسه گونو-گوندن سولوردو. عطری-طراوتی آزالیردی. اونون نملی و پریشان گؤزلری تپه نین باشیندان قایایا دیکیلمیشدی. داغ چایی نه قدر چالیشیردی، گول کولونون اوره یینی اله آلا بیلمیردی. گونو-گوندن سولوب-سارالان گولون دردینی-سیررینی آنلاماغا چالیشیردی. "آخی نییه بو گؤزه ل چمنی، یاشیل تپه نی بینمیر؟"      

داغین قوینوندان مئه قوپدو. چایین یاتاغیندان اسیب کئچدی. گولون قوروموش اینجه لچکلری چایین باغرینین باشینا کؤز کیمی الندی. ... چای یالنیز ایندی باشا دوشدو کی، گول کولو کؤکلو-کؤمجلی وطن حسرتی چکیر. نهنگ قایالیق گؤزل چمنزار اولماسا دا، آخی اورا گول کولونون ازلی و ابدی وطنی ایدی. وطن حسرتی گول  کولونو سولدورموشدو.

... قیزیلگول کولو وطنسیز قالمیشدی.



  • [ ]