+0 به یه ن
یازار: ارنئست همینقوی (Ernest Heminquey)
چئویرن: تامئللا عبدییئوا(Tamella Abdıyeva)
کؤچورن: قدرت ابوالحسنی سهلان
پادوادا ایستی بیر یای آخشامی ایدی. نهایت کی، بوراداکی آداملارین کؤمه ییی ایله داما چیخان یارالی عسگر یوکسکلیکدن شهره تاماشا ائدرک تمیز هاوانی جییرلرینه چکیردی. سمادا سرچه لر های-کویله اوچوشور، سانکی اویناشیردیلار. آنجاق، بیر آز کئچمیش هاوا قارالماغا باشلادی و بونونلا دا پروژئکتورلار ایشه دوشدو. دامداکی دیگر آداملار ایسه بوش شوشه لری گؤتوره رک یاواش-یاواش آشاغی دوشمه یه باشلادیلار. اونلارین سسی بوتون هاوانی بوروموشدو.
آرا ساکیتلشدیکدن سونرا لوز چارپاییدا -اونون یانیندا ایلشدی. نفسکسن ایستی یای گئجه سینده اونون گؤزل و طراوتلی ووجودو اینسانا بیر یاز مئهی تک سرینلیک بخش ائدیردی.
آرتیق اوچ ایلدیر، لوز بورادا گئجه نؤوبه سینده طیب باجیسی ایشله ییر. بو موددت عرضینده او، بوتون خسته لرین اوره یینه یول تاپا بیلمیشدی. لوز همین یارالی عسگر اوچون عملییات ستولونو حاضیرلادی، اونا توختاقلیق وئرمک اوچون ایسه گاه دوستجاسینا ظارافتلاشیر، گاه دا لاغلاغی ائدیردی. داها سونرا یارالی عسگره کئلشدیریجی وورولدو و بونونلا دا، یارانمیش بوشلوغو دولدورماق اوچون بوش بوغازلیق ائتمه یه هئچ بیر لوزوم قالمادی. عملییاتدان سونرا قولتوق آغاجینا اؤیره شن عسگر، آرتیق، هئچ کیمین کؤمه یی اولمادان دا تئمپراتورونو اؤلچه بیلدیییندن داها لوزون چارپاییندان دوشمه سینه هئچ بیر احتییاج قالمیردی. بورادا چوخ آز خسته وار ایدی و هامیسی دا اونلار آراسینداکی موناسیبتدن خبردار ایدی. بوتون خسته لر لوزون خاطیرینی چوخ ایسته ییردی. لوزا قارشی داها درین حیسسلر بسله ین بو یارالی عسگر ایسه دهلیز بویو گئری قاییدارکن اونو اؤز یاتاغیندا خیال ائدیردی.
جبهه یه قاییتمازدان اوول اونلار دومایا گئدیب دوعا ائتدیلر. ساکیت و آلاقارانلیق بو مکاندا اینسانلار دوعا ائتمکله، سانکی، اؤزلرینی تانرییا داها یاخین حیسس ائدیردیلر. ائولنمک اوچون بورایا گلمیش بو جوتلویون ایسه نه سندلشمه اوچون واختی، نه ده دوغوم حاققیندا شهادت نامه لری وار ایدی. اونسوز دا، هئچ بیر سند اولمادان دا اونلار اؤزلرینی ائولی حیسس ائدیردیلر، آنجاق، بعضن بیر کاغیذ پارچاسی سئوگینی هئچ قورخمادان بوتون دونیایا جار چکمه یه گوج[اولور] ، سانکی، هئچ واخت اونو ایتیرمه یه جه یینه ضمانت وئریر.
اونون جبهه ده اولدوغو موددتده لوز چوخلو مکتوبلار یازسا دا،اونلار یالنیز موحاریبه دن سونرا منزیل باشینا چاتدی. او، جبهه یه گتیریلن اون بئش قالاق مکتوبو تاریخلرینه گؤره سئچیب، هامیسینی بیرنفسه اوخودو. بوتون مکتوبلاردا لوز خسته خاناداکی حیاتیندان، بیر ده اونو نئجه سئودیییندن، اونسوزدا گئجه لرین نئجه اوزون، دهشتلی کئچدیییندن و داها بو جور باجارمادیغیندان یازیردی.
موحاریبه قورتاراندان سونرا اونلار قرارا گلدیلر کی، ائولنمک اوچون یئگانه یول بو جوان اوغلانین اؤز وطنی، آمئریکایا دؤنوب، یاخشی بیر ایش تاپماغیدیر. لوز ایسه او، بیر ایش تاپاناجان اونون یانینا گئتمه یه جک، یوخ اگر داریخسا، یالنیز او زامان گؤروشمک اوچون نییویورکا گلجکدی. هر حالدا، ایکی سئون قلبین ایسته یی بئله ایدی. ... اوغلان ایسه سؤز وئردی کی، ایچمه یه جک، دوست-تانیشلا عیش-عیشرت مجلسلرینه گئتمه یه جک، گئجه-گوندوز یالنیز و یالنیز بیر یووا قورماق اوچون ایشله یه جک. بلی، بو ایدی اونون مقصدی: ایش تاپماق و ائولنمک. بونونلا بئله، پادوادان میلانا گئدن قاطاردا لوزون اونونلا گئتمک ایسته مه مه سی سئوگیلیلر آراسیندا موباحیثه یه گتیریب چیخاردی. میلان واغزالیندا آیریلیق زامانی چاتاندا، اونلار بیر-بیرلریله همیشه کی کیمی اؤپوشوب آیریلسالاردا، موباحیثه هله ده بیتمه میشدی. سئودییی قادینلا ائولنمک اوچون اوندان کیلومئترلرله مسافه اوزاق قالماغی بئله گؤزه آلان بو جاوان اوغلان ایسه لوزلا بو شکیلده آیریلدیغینا گؤره چوخ مایوس ایدی.
بئله لیکله او، ژئنوادان قاییقلا آمئریکایا یولا دوشدو. لوز ایسه خسته خانا آچماق اوچون پاردونونه شهرینه گئری قاییتدی. یاغیشلی، سسسیز بو شهرده سوکوتو یالنیز بیر نئچه موددتدیر بورا یئرلشمیش آردیتدی باتالیونو پوزوردو. قارلی-یاغیشلی هاوادا، پالچیقلی کوچه لرده قیشی کئچیرن باتالیون مایورو لوزا وورولور و اونا عشق اعلان ائدیر. ایتالیانلارا هئچ ده یاخشی بلد اولمایان بو قیزجیغاز ایسه شتاتلارا، آرتیق کئچمیشینین بیر پارچاسی سایدیغی همین، آمئریکالی عسگره مکتوب یازاراق اونلار آراسیندا یاشانانلارین ساده جه اؤتری هوس اولدوغونو بیلدیریر. لوز بو حرکتینه مایوس اولسا دا، چوخ یاخشی بیلیردی کی، بوتون بونلاری قبول ائتمک اونون اوچون آسان اولمایاجاق، آنجاق، اومید ائدیردی کی، بلکه، نه واختسا باغیشلاناجاق. بو تله سیک سئوگی ماجراسیندان عاغلینی ایتیرمیش بو جوتلوک ایسه گؤزله نیلمه دن یازدا ائولنمه یه قرار وئریرلر. آنجاق، بوتون اولانلارا باخمایاراق، لوز یئنه ده همین عسگری اوولکی کیمی سئویردی، همیشه ده سئوه جکدی، آنجاق، قلبینین درینلییینده بونون اصلینده آدی رغبت حیسسیندن باشقا بیر شئی اولمادیغینی یاخشی آنلاییردی. او، بوتون قلبییله اینانیردی و آرزو ائدیردی کی، بو جاوان اوغلان نه واختسا اؤزونه بؤیوک کاریئره قوراجاق و هر شئیی اونوداجاق. لوز اینانیردی کی، بئله هر ایکیسی اوچون یاخشی اولاجاق.
واخت اؤتدو، زامان کئچدی. ... آنجاق، ایش ائله گتیردی کی، مایورو اونونلا نه یازدا، نه ده باشقا بیر فصیلده ائولندی. لوز ایسه بو باره ده چیکاقویا یازسا دا هئچ واخت مکتوبونا جواب آلمادی. آمئریکالی عسگر ایسه بیر موددت سونرا، لینکولن پارکیندا تاکسی سوردویو واختلاردا یونیوئرماغین ایلمه شؤبه سینده ایشله ین ساتیجی قیزدان قونورئیا خسته لییینه یولوخموشدو.
* دوما- میلاندا باش کیلیسا
* قونورئیا جینسی یوللا کئچن خسته لیکدی. جینسی یوللا یولوخان بو اینفئکسییا شخصدن شخصه واگینال، آنال و اورال سئکس زامانی کئچیر.