آرابا ده ییشمه

+0 به یه ن

Image result for ‫پراید‬‎  

بایراما ایکی-اوچ آی قالاندان تبریزه جار دوشموشدو، یئنی ایلده ماشین باهالاشاجاقدی. اونا گؤره چوخلاری ایل دؤنمه میش آرابا ده ییشمه یه گیریشیب، ایکی ماشین دوزلدن کرخانین بیرینده آرابا یازدیرماغا چابا گؤستریردیلر. باجاناغیم کؤهنه پرایدینی ساتیب، صندوقلو پئژو 206 یازدیرمیشدی. باجاناق 20 میلیون تومن یازیلما پولو تؤکوب، دؤرد دانادا آلتی میلیون یاریملیق آلتی آیدان-آلتی آیا چک وئرمیشدی. بئله جه او  40 میلیونلوق آرابا اوچون 46 میلیون اؤده یه جک ایدی. قایناتام، 18میلیون وئریب رئنو- ائل 90 یازدیرمیشدی. قایناتا ایکی آی سونرا سوردویو سمندینی ساتاجاق ایدی و گونون قییمتییله پولون قالانینی اؤده دیکده تازا آراباسینی آلاجاق ایدی. اونلاردان باشقا ایش ریمده ده آرابا یازدیرانلارین سایی آز دئییلدی. باجاناق، قایناتا و امکداشلار ایشلنه رک یاوالانمیش ماشینلارین گوونلییینین آز اولماسیندان دئییب اونلاری بو چاغدا ده ییشمه نین لاپ یاخشی بیر قرار اولدوغونو سؤیله ییردیلر. من، قایناتاگیلین یازیلدیغینی خانیمدان ائشیدنده اوولجه بیر آز نیگران اولدوم! نییه کی دئدیم بس، اونلار بیزدنده بورج ایسته یه جکلر و منده بیر گون ائحتییاجیمیز اولار دئیه گئچن ایل عرضینده یئییب-گئیمه میزدن کسیب بالا-بالا حئسابیمدا یاتیردیغیم 5 میلیون تومنی بانکدان چیخاردیب اونلارا بورج وئره جگم. آخی من، آپارتومان، فرش و هر یاندا اسکیک گتیرنده قایناتامگیلدن بورج آلمیشدیم و اؤزومو اونلارا بورجلو بیلیردیم. آنجاق ایللر ایدی الیمه ائله ده پول گلمیردی. خانیمدان جریانی سوروشدوقدا آیدینلاتدی، هله لیک قایناتاگیلین اؤزلرینین پوللاری وار، آمما بیردن بایرامدان سونرا ماشین چوخ باهالاشسا، اوندا اونلارا یاردیم ائتمه لی ییک. هر حالدا، باجاناق ایله قایناتانین آرابا یازدیرماقلاری بیزیم ائوده اعتیراضلارا ندن اولدو! عاییله اون ایلدن بری سوردویوم آغ پرایددان دوغرودان یورولموشدولار. بالا قیزیم ایله اوغلوم او یان-بو یانیمدان گئچنده، بابا سنده 206 آل دئییردیلر. بؤیوک قیزیم، قوهوملار یازدیران ماشینلارین هئچ بیرینی بینمه ییب شاسیسی اوجا آرابالاری سئویردی! آنجاق بیزیم آلتی مرتبه-آلتی عاییله یاشایان بینانین تانییانلار بیلیردیلر کی، باشقا بئش پارکینگ دولو اولورسا ابدا شاسیسی اوجا ماشین، بیزیم (دؤردونجو مرتبه نین) آپارتومانین پارک یئرینه گیریب چیخماز!! خانیمین نظری بئله ایدی، پرایدی ساتاق بیر آز یوخاری مودئل تیبا آلاق. او دئییردی مین موصیبتله تازا آرابا آلا بیلسکده حاییفدی، چونکو سن تئزلیکله اونو او یان-بو یانا چیرپاراق یاری قییمت ائده جکسن!! تیبا آراباسینی منده بینیردیم، چونکو بیر یول اونونلا چیرپیشاندا پرایددان چوخ-چوخ مؤحکم اولدوغونو قاورامیشدیم! ... او زامانلار من کنکاش ائتدیییم هر کیمسه، پرایدین ان گوونمه مه لی آرابا اولدوغونا وورغو یاپیرکن، اسکی پرایدی یوبانمادان ده ییشمه نی منه لاپ دوغرو بیلیردیلر. دئییردیلر، ایللردیر جادده چارپیشمالاریندا ان چوخ صدمه گؤرن آرابا همیشه پراید و اؤلنلرین چوخودا ائله پرایداکیلار اولور. هابئله اونلار اوزوله رک قئید ائدیردیلر، پراید دوزلدنلره خالقین جانینین هئچ اؤنمی یوخدو و آغالارا تکجه پارا اؤنملیدی! ماشیندان بیر آز چوخ باش چیخاردانلار ایسه دئییردیلر، تیبا پرایددان فقط بیر آز یاخشیدی و بابت ماشین آلماق اوچون سن گره ک آزی 40 میلیون توپلایا بیله سن!

هفته اوچو گونو، دوندوران آیین ایرمی اوچو ایدی. ناهاردان سونرا ایشدن چیخاندا، سوروب گئدیب اوچ-دؤرد یئردن قییمت ائتدیکده پرایدیمین 13-12 میلیونا ساتیلا بیله جه یینی آنلادیم. آردیندان، فیکیرلی-فیکیرلی ائومیزه قاییتماق ایسته دیم. یولدا وضعیتی بیرده سالیب چیخدیم. بئش میلیون حئسابیمدا وار ایدی، بئش-اون گونه ده 2 میلیون بایراملیق آلاجاق ایدیم. بئله اولاندا 20 میلیون تومن بیر یئره ییغیب، باجاناغیم یازدیران کیمی منده یازدیرا بیلردیم. آنجاق آلتی آیدان-آلتی آیا آلتی میلیون یاریم ییغماغا گلنده، قالیردیم. عاغلیم تکجه بانکلاردان فاییزلی وام گؤتورمه یه چاتیردی و بیر قولای حئسابلایاندا آنلاییردیم، 40 میلیونلوق آرابا اوچون 60 میلیونا یاخین اؤده مه لییم! بئله سیخینتیلی گؤرونن گلجه یه باخمایاراق، پرایدین گوونلییینین آزلیغیندان قورخویا دوشموشکن، اوشاقلارین ناراحات اولماقلارینداندا کدرله نیردیم. نهایتده ده اؤز-اؤزومه دئدیم، کیشی سنده تئز اول ریسک ائت آرابا یازدیر!! بو آرابادان قورتول و قوی اوشاقلارین سئوینه رک هر یئرده دئسینلر، بیزده تازا ماشین آلاجاغیق! هر حالدا، آرابادا قراریمی کسینلشدیریب صاباحلاری یقین گئدیب یازدیراجاغام دئدیم. اؤزوده دوز باجاغیم یازدیردیغی کیمی، آغ بویالی صندوقلو پئژو 206! ائوه یئتیشدیکده، هیجانلی-هیجانلی گونون اولایلاریلا قراریمی سؤیله دیم. خانیم بیر سؤز دئمه دن فیکیرلی اولدو، آمما اولدوقجا موتلو اولان اوشاقلار ائله بیل ایلک دفعه اولاراق بو قدر آتالارینا اوموب گووندیلر.

او گئجه یاتاغیمدا 206 باره سینده چوخلو فیکیرلشدیم. خیالیمدا، یئنی آرابانی کاپوتاژ ائتدیریب، آذربایجان، تورکیه و باشقا اؤلکه لری گزدیم. قارا گوزگو تاخارکن آغ گوونمه لی ماشینی گؤزل جادده لرده سوره-سوره، عالیم قاسیموف، کؤنول و ابراهیم تاتلیسسین سی دیلرینه قولاق آسدیم. بئله جه داهادا آرتیق یئنی آرابا آلماغا تلسدیم. او دویغولاردا اولار-اولا، اسکی پرایدادان و پرایددا اوخوتدوغوم نوحه ایله غملی ماهنیلاردان یاخامین بیر یوللوق قورتارمیش اولدوغونو ساندیم. یوخویا گئتدیکده ایسه، آغ 206 سوره رک اؤزومو اوولده باکیدا، سونرادا ایستانبولدا گؤردوم.

چرشنبه آخشامی سحری، فیکیرلی-فیکیرلی ائودن چیخیب، آسانسورلا پارکینگه یئندیم. گونده کیمی قونشولارین هئچ بیری هله آرابالارینی چیخارتمامیشدیلار. قارشیداکی خییاوان قاپیسینین ساغ چیینینده اولان پارک یئریمه ساری یئریمه دن، دایانیب باشقا ماشینلارین دورومونا بیر باخدیم. ایکی آرابا منیمله قوشا ساخلامیشکن، ایکیسیده قاپینین سول طرفینده بیر-بیرلریله قوشایدی. سونونجو ایسه قاپی آغزیندان فاصیله لی اولاراق ایکی طرفین اورتاسیندا آسانسورا یاخین پارک ائتمیشدی. گئچیب، گولومسه یه-گولومسه یه بیر موددت، اورتاداکی صندوقلو آغ 206 –نین او یان-بو یانینا اوندایاجان ائتمه دییم باخیشلا باخدیم. اوره ییمده، نه قدر دوروشقلو ایمیش بو آرابا و من بیلمیردیم دئدیم. آردیندان خییاوان قاپیسینی آچدیم. ماشینیمی ایشله دیب ایکی دؤنه دالی-قاباق ائتدیکده قاپیدان خییاوانا چیخارتدیم. دوشوب قاپینی باغلاماق ایسته ینده، 206 –یا یئنه ده خوش نظر ائتدیم. مینیب فرمانی سولا چؤندریب، یاواش-یاواش ایش یئریمه دوغرو یولا دوشدوم. سحری هیجانلی-هیجانلی اون-اون بئش دقیقه خییاوانلاردا سوررکن، نئچه-نئچه قیراقدا پارک ائتمیش آغ 206 گؤزومه ساتاشدی. نئچه آغ 206 –نین قارشیدان گلمکلرینی و اوچونونده مندن اؤنه گئچمکلرینی گؤردوم. هابئله بیریندنده من قاباغا گئچدیم. آرابادا اؤز-اؤزومه هر دؤنه دئدیم، تبریزده نه ده چوخ آغ 206 واریمیش و من بیلمیردیم!؟ ایداره یه چاتدیقدا، گیریش قاپیسیندان ردیف-ردیف بوللو کولگه لیکلی پارک یئرلری دوزدیلمیش بؤیوک پارکینگینه گیردیم. حئیرتله آرالیدان تازا یئتیشمیش بیر امکداشیمین آغ 206 پارک ائتمکده اولدوغونو گؤردوم. اؤزومه بیر پارک یئری سئچیب، یاواشجا سوروب بیر آغ 206 -لا قوشا پارک ائتدیم. دوشوب ایداره بیناسینا دوغرو گئدرکنده، یاخین-اوزاقدا نئچه آغ 206 –نین پارک ائتمیش اولدوقلارینا تانیق اولدوم. هیجانلا اؤز-اؤزومه دئدیم، کیشی ایداره ده بو بئله آغ 206 واریمیش، اوندا بس سن نییه ایندییه جن اونلاری گؤرموردون!؟ اوشاقلارینا دئییردین کی، هامی سنین کیمی پراید سورور!!

او گون ایشدن فورصت تاپاندا، 206 -نین نه جور اولدوغونو او آرابادان سورن امکداشلاردان سوردوم. اونون یاخشی بیر آرابا اولماسینی سؤیله ییب، آمما دالی صندلینین دراشلیق اولدوغونو و اوچ اوشاغین اورادا راحاتجا ایله شه بیلمه یه جکلرینی دئدیلر. مشورت ائتدییم امکداشلارین بعضیسیده، 206 -نین گؤروونوشو گؤزلدی، سن آرابا آلسان گئت قییمتی 206-یا یاخین اولان ائل 90 آل دئدیلر. اونلار هابئله ائل 90 -نین چوخ داش دؤیر بیر ماشین اولدوغونا وورغو یاپیب، دالی صندلینین گئنه بولدو اولدوغونودا سؤیله دیلر. بئله لیکله، امکداشلارین دلیل-نصحیتلری منیم عاغیلیما باتیب، 206 آلماقدان بیر یوللوق واز گئچدیم و قاباقجالار آرخا طرفینی بینمه دیییم ائل 90 -ا ماراقلاندیم. آخشام، گونون جریانلارینی حرارتله ائوده تعریفله دیم. اوشاقلار راضی اولوب، آنجاق خانیم یئنه فیکیرلی اولدو. بو سفر ائل 90 آلماغا، اونو نه تهر پارکینگده پارک ائدیب چیخارتماغا و هابئله اونونلا اوزاق سفرلره گئتمه ییمه فیکیرلشدیم.

چرشنبه گونو، پارکینگدن چیخارکن سول طرفده آرد-آرد پارک ائتمیش ایکی دانا ائل 90 گؤزومه ساتاشدی، بیری آغ، بیریده گوموش بویالی ایدی. اونلاردان علاوه او سحر  خییاوانلارلاردادا، ایداره ده هر یان آغ یادا گوموش رنگلی ائل 90 ایدی! او گون، ائل 90 بیردن پارکینگیمیزه گئدیب-چیخماز دئیه، اینتئرنئته باش چکدیم و او آرابانین ائن-بویونو یازیب، پرایدینکییلا توتوشدوردوم. چوخ شیشیک گؤرونوشونه باخمایاراق، گئدیب-چیخا بیله جه یینی دوشوندوم. آنجاق، ایکی کرخانیندا ساتیش صفحه سینه باش ووراندا، کدرله نرک ائل 90 -نین قیسطیلا ساتیلمادیغینی گؤردوم. دئمک، اونو ایکی یادا دؤرد آی سونرا تحویل وئرنده بوتون پولونو بیر یئرده اؤده مه لی ایدین، دوز قایناتامین یازیلدیغی کیمی! من اسکیک اولان 20 میلیونا فیکیرلشنده، یئنه تکجه وام گؤتورمک ذهنیمه چاتدی. اؤز-اؤزومه دوشوندوم، دونالد ترامپین هده له مه لریله دولار حتما باهالاشاجاق، نتیجه ده ماشیندا هر ذادا تای باهالاشاجاقدیر! بونا گؤره، ریسک ائده رک واما گیرشیب دیر ایتیرن تومنی آرابایا تبدیل ائتمک صرفه لی اولاجاقدی! آمما بیرده دوشوندوم، بو اؤلکه ده باهالاشمانین قارشیسینی آلماغا هئچ بیر تدبیر یوخدو و اونا خاطیر بایرامدان سونرا آرابا چوخ باهالاشیرسا، ایندی یازدیرسامدا اوندا گونون قییمتییله آلا بیلمه یه جه یم!!      

آخشام ائومیزه دؤندوکده، اوتوروب خانیملا درین-درین مشورت ائله دیم. عاییله مین گئرچک ائحتیاجلارینی دریندن باشا دوشدوم. یئنی آرابا یوخ، بلکه لازیم یئمکلر و آبیریلی باشماق-پالتار ایدی! آنلادیم، بیز سیخینتیلارا دوشه رک یئنی آرابالار یارادان گوونلییی ایسته میریک! دریندن بیلدیم، بو اؤلکه ده بیزیم حاققیمیز یوخ پرایددان باشقا بیر ماشین سورک. سورسئیدیک، ایندییه جن سورموشدوک! چونکو بیز وارلانماغا یوخ، یوخسوللاشماغا یؤنلدیلیریک! سونوموزوندا هارا چاتاجاغی بللی دئییل! بو چاغدا آرزوموز ائل 90 ایله 206 آلماق اولوب کی، دئییرلر اونلار یابانجی اؤلکه لرده دوزه نیلن گونسل آرابالار قاباغیندا ائله ده بیر حئسابا قویمالی آرابا دئییللر!!... بئله لیکله، ائل 90 آلماغیدا بوراخیب گئجیکمه دن عاییله مه یئتیشمه یی دوشوندوم. او گئجه یاتمامیش بالالاریما گلن ایل اینشاء آلله یئنی آرابا یازدیراجاغیق دئییب، اونلاری بوتونلوکله اومسوندورمادیم. یاتاغیمدا، اولو تانرییا پرایداکی گوونلییی الیمیزدن آلما دئدیم. هابئله، کؤهنه پرایدلا هوشلی-باشلی و ائحتیاطلی سورمه یه قرار وئردیم.

سونراسی گونلر ایداره یه گئدنده هر بویادا و هر مودئل آرابا گؤزومو چارپیردی. 



  • [ ]