باهالیق

+0 به یه ن

باهالیق دوشموش شهرده، چوخلاری هفته ده بیر دفعه آنجاق گوله بیلیردیلر. اورادا، لازیم اولان جینسلرین گوندم باهالاشمالاری گلیری آز خالقی کدرلندیریب، پوزغون ائدرک فیکیرلره سالیردی. دؤولت قییمتلری ثابیت ساخلایا بیلمیردی و دؤزون دوروم یاخشیلاشاجاق دئییردی. آنجاق، جینسلری گونده یوکسلن دولار قییمتیله آلان خالق دؤولتین سؤزونو هئچ اینانمیردی. ائشیکده توپلاشیب دوروما اعتیراض ائتمک سوچ حئسابلانیرکن، هئچ کیم دیشاری چیخا بیلمیردی. بونونلا بئله ایکی نفر هر هارادا و هر دورومدا دانیشاندا فقط باهالیقلاردان گیلئیله نیب دؤولتله نظارت قوروملارینی قناییردیلار. بو شهرده یاشایان آیلیغی ثابیت ایشچی توغرولون وضعیتیده بئله اولموش، چوخونا تای گونو-گوندن یوخسوللاشیردی.

پاییز گئجه سی ایکی مدرسه قیزلاری او بیری اوتاقدا یاتمیشکن، توغرول ایله ترلان یاتمامیش تختلرینده اوزاناراق باهالیقدان دانیشیردیلار. ترلان ناراحات-ناراحات، پنیر، چای، روب، یومورتا، دویو، یئر آلما و دیش خمیرینین قییمتینین آرتماسیندان دئدی. آردینجا، یاغین احتیکار اولونوب توکانلاردا تاپیلماماسیندان و چوره کلرین گوده لنمه سیندن ایضاحلار وئردی. توغرولدا آزاد دولارین بوگون ایرمی مین تومنه یاخینلاشدیغینی و آرابا قییمتلرینین میلیون-میلیون آرتدیغینی سؤیله دی. ترلان مدرسه اوشاقلارینا بو ایل تازا پالتار آلا بیلمه دیکلرینی و دفتر-میدادین نئچه قات باهالاشدیغینی وورغولایاندا، توغرول دویغولاناراق کئشکم بیر باشقا ایشده گؤره بیلیئیدیم دئدی. یئنه ده بیرینی او دئدی، بیرینیده بو دئدی. هر حالدا، ایکیسیده جماعتین بو دورومدان یامان اوساندیغینی و اوزلریندن گولوشون قاچدیغینی قئید ائتدیلر. توغرول باهالیق قونوسوندا دؤولتین باجاریقسیزلیغنی اصلی عامیل بیلدی، آمما ترلان چوخراق ایشلرینی دوزگون گؤرمه ین نظارت قوروملارینی گوناهلاندیردی. اونلار بئله جه یاریم ساعاتا یاخین چاره سیز-چاره سیز سیزیلدادیلار. دیبده ایسه چیراغی سؤندوروب یاتدیلار.

جوما آخشامینین یاری گئجه سی گئچمیش، کیشی یوخودان اویانیب ائهمالجا اوتاق قاپیسینی قیفیللاییب چیراغی یاندیردی. سونرا یاواشجا حیات یولداشینی چاغیریب یوخودان اویاتدی. ... حتتی هفته لیک ایشین حینینده ده اونلار باهالیقدان گیلئیله نمکده ایدیلر. آرواد، قادین پئدی، لیفجیگ، شورت، کاغاذ دسمال و ماتیکین یئنی قییمتلرینی بیر-بیر پیچیلدایاق سیرالادی. کیشی، گئچن سفر آلدیغی اون-بئش مینلیک کاندوم قوطوسونو بو سفر اوتوز ایکی مینه آلدیغینی دئدی. آرواد، اؤتن ایل قیزیللاریمی ساتماسایدین، ایندی یوز میلیوندان چوخ قیزیلیم وار ایدی دئیه اعتیراض ائتدی. کیشی تئزراق جوابلادی، قیزیللاری ساتدیقدا بو آپارتومانی آلا بیلدیک، یوخسا بو ایله قالسایدی هئچ واخت آلا بیلمز ایدیک! اون دقیقه سوووشموشدو کی، کیشی داها فیکیرینی باهالیق قونوسوندان یاییندیرماق ایسته دی. اوندا محببتله آروادین او یان-بو یانینی تومارلاماغا باشلادی. کیشی بیردن، "...کیم بیزی کاسیب ائله ینلرین نه کی وارینی!" دئدی و داهادا آرتیق حرکتلندی. آرواد تعججوبله نیب قیزاردی و سوساراق داها باهالیقدان دئمه دی. کیشی گولومسه یه رک دؤنه لرله گلیب آروادین قولاغینا پیچیلدادی: "بیزی کاسیب ائله ینلرین نه کی وارینی ...کیم!" اون بئش دقیقه سورن ایشین سونوندا ایسه، ترلان گولوب توغرولدا گولدو!       



  • [ ]