وطن ساغ اولسون!

+0 به یه ن

Image result for ‫حسن دمیرچی وفات ائتدی سایت ایشیق‬‎   

یولومدا بئش تیغاج چیراغی وار ایدی، بئشیده منه قیرمیزی یاندیلار. چیراقلار آرخاسیندا دایانمالی اولاندادا، وطندن تازا کؤچموش آسلان کیشینی کدرله خاطیرلاییب، تئز-تئز اؤز-اؤزومه،"حئیف اولدو، حئیف اولدو!" دئییردیم. وطن کئشییینده دورموش موسیقیچینی هئچ زامان یاخیندان گؤرمه میشدیم، آنجاق تورکون دیرلری گوبودجا پوزولانان بو اؤلکه ده، اونون آذربایجان تورکلرینین حاقلاریندان مودافیعه اتئدیکلرینی آنیردیم. بئله فیکیرلرده  اولاراق، او آخشام سوروب آسلان کیشی اوچون یاس تؤره نی قورولموش مچیدین یاخینینداکی مئیدانا چاتدیم. اورالاردا آراباما اویغون بیر یئر تاپیب، پارک ائدیب یئندیم.

خییاوان قیراغی ایله، یاواش-یاواش مچیده دوغرو یئریدیم. آرالیدان پولیسلر او یان-بو یاندا گؤرسنیردیلر، مچید قاباغیدا قالا بالیق ایدی. مچید یاخینلیغیندا، "حسن آذربایجان" تانینان آسلان کیشینین، تورکجه یازیلان نئچه بیلدیریسی گؤزه چارپیردی. بیلدیریلره اؤتری بیر باخدیم. آردینجا، مچید دهلیزینه گیریب باشماقلاریمی چیخاردیب آیاغیمی گئت-گللی مکانا قویدوم. چئوره سینه صندل دوزلموش بؤیوک مچیدین اورتالاریندا، بیر بوش یئر تاپیب اوتوردوم و یوبانمادان حسن آذربایجانین روحونا اوره کدن بیر فاتیحه اوخودوم. او چاغدا ایکی ساعاتلیق تؤره نین اورتالاری ایدی. نئچه نفر چای پایلاییردی، بیر نفرده قورآن جوزوه لرینی دولاندیریردی. باشقا یاس تؤرنلریندن فرقلی اولاراق، بورادا سس اوجالداندان غملی-غملی آذربایجان ماهنیلاری سسلندیریلیب، بیر-بیر حسن آذربایجانین روحونا سونولوردو. چپیک چالماق ایسته ینلر وار ایدی، آمما سس اوجالداندان صلوات چئورمکلری ایسته نیلیردی. مچیده گؤز دولاندیردیغیمدا، وطن کئشییینده دورموش نئچه اینسانی تانیدیم، چوخونو ایسه تانیمیردیم. اوزون ساچلی بیر شستلی کیشی، سس اوجالدانین آرخاسینا گئچیب، "اولو آذربایجان!" سسله دی و اوره یه اوخشایان سؤزلر سؤیله دیکده، گور آلقیشلاندی. کیشینین تبریزلی اولوب- اولمادیغینی سول بؤیرومده ایلشمیش بیریندن سوروشدوم. اودا تبریزلی دئییل، کلیبرلیدی دئدی. سس اوجالدان اصلا دایانمیردی! ائله بیل بیر آرایا گلنلر، حسن آذربایجانین یاس تؤه نینی ائل آجیلارینی دیله گتیرمک اوچون ان یاخشی فورصت بیلیردیلر!!

یاریم ساعات اوتوردوقدا، قالخیب اؤزل مجلیسدن گئتمک ایسته دیم. چیخا-چیخا ساغ الیمی سینه مه قویوب آتدیم-آتدیم یئرییب تانیمادیغیم آیاق اوسته کیلره، "آلله رحمت ائله سین!" دئدیم. یاشلیلاردان، "آیاقلاریز آغریماسین!" و گنجلردن، "وطن ساغ اولسون!" جوابینی ائشیتدیم. تئز باشماقلاریمی گئییب دیشاری چیخدیم.

مئیدانا گلیب آراباما میندیم و گلدیییم یوللا ائویمه ساری دؤندوم. هر قیرمیزی چیراق آرخاسیندا گئجیکدیریلنده، مچیدده گؤردویوم وطن کئشییینده دورموش کیشیلر گلیب ذهنیمدن گئچدیلر. منده دویغولاناراق دؤنه لرله، "وطن ساغ اولسون!" دئدیم. 



  • [ ]