+0 به یه ن
یاشیل بؤلگه
بیردن، دیبسیز-بوجاقسیز، یام-یاشیل بیر بؤلگه گؤزو اؤنونده جانلاندی. گؤی ماس-ماوی، هاوا یاز هاواسیندان طراوتلی ایدی. ساواشدان-اعتیراضدان هئچ بیر خبر یوخ ایدی. ائله بیل اورادا هر کیمه گره کن حاققینی وئرمیشدیلر. یاشیل بؤلگه ده هر اینسانا، گوونلیکلی، اؤزگور و صفالی بیر باغ آییریب باغیشلامیشدیلار. باغلارین ایچینده توکنمز و چئشیدلی نعمتلر وار ایدیلار. خورما، نار، موز، اوزوم و باشقا-باشقا یئیشمیش آلچاق بوتالی میوه لر، سیرا-سیرا گؤرسنیردیلر. آلچاق بوتالی میوه لرین بیرینی درن کیمی، باشقا بیر یئتیشمیشی تئز اونون یئرینه چیخیب بوتالارین گؤرکمی ال دیمز کیمی گؤرونوردو. بویالی گوللر، هر یانا عطیر ساچماقدا اولاراق ایچمه لی شرابلار باغ ایچیندن سوووشان آرخلاردان آخماقدایدیلار. صفالی باغلاردا بیر بالا اوتاق و بیر بؤیوک اوتاق تیکمیشدیلر، بیر دوشنمیش تختیده بؤیوک اوتاغین قاباغیندا یوکسلتمیشدیلر. آیاق یولوندان ایسه اثر یوخ ایدی.
او، قادین باغلارینین ایچریسینه داها آرتیق ماراقلاندی. هر قادین باغینین ایچینده، باغ یییه سی تانینان اوزو گولوشلو بیر قادین اوراداکی نعمتلردن باشاردیقجا فایدالانیردی. قادین اؤزگور باغیندا گوللر ایچینده قدم ووراندا، گنج، آغ بدن، گؤزل بیر کیشی تار چالاراق اونون دؤوره سینه دولانیب گؤزل سسیله اوره یه اوخشایان ماهنیلار اوخویوردو. اودا ماهنیلاری ائله بیل ایلک دؤنه دیر ائشیدیر، اولدوقجا لذذت آپاریردی. دورومدان راضی گؤرونن قادین، هردن ال آتیب آلچاق بوتالی میوه لردن دریب لذذتله یئییردی. هردن ماهنی اوخویاندان بیر قدح شراب دولدورماسینی ایسته ییردی. آجلیق حیسس ائدنده ده، گئچیب تخت اوستونده ایله شیردی و سوفره سینه هر سفر یئنی بیر دادی اولان قوش اتی، هابئله ایسته دییی باشقا یئمه لیلر قویولوردو. قادینین هاچان اوره یی ایسته دیکده کیشیلییی اییلمز اوخویان کیشیله قوشا بالا اوتاغا گئدیردی. هاچان ایسته سئیدیده، بؤیوک اوتاقدا بؤلگه اهلیندن اولان سئودیکلریله ایلنجه مجلیسی قورا بیلیردی. کیشی باغلارینا باخاندا، وضعیتی قادین باغلارینا اوخشار ایدی. فرقی تکجه بو ایدی کی، او باغلاردا جئیران گؤزلو، قیزلیغی پوزولماز بیر گنج قادین، اوخویاراق کیشینین باشینا دولانیب بوتون وارلیغیلا قوللوق ائدیردی.
آمنه، سئوه رک اوجالاردان یاشیل بؤلگه نی ایزله ینده، او دونیایا کؤچمه یینی آرزولادی. دول آرواد بو حالدا یاخینلارینی خاطیرلاییب بؤلگه ده اونلاری تاپماق ایسته دی. بیلگی سایار باغینا یوللاندی. بیلگی سایاردا، ماللالار، قاضیلار و باشقا اللی لیستی آراشدیردی، آمما بئش ایل قاباق دونیاسینی ده ییشمیش آتاسی ماللا حسنی هئچ بیر لیستده گؤرنمه دی! سیاستچیلر لیستینیده بیر باخدی، آمما لیستلری بوم-بوش ایدی! ماللا قیزی بازار اهلی لیستینده، بیلدیر دونیادان گئتمیش اری حاجی ایسکندرین آدینی تاپیب، یئرینی ایسه تانیدی. سونرا تلم-تله سیک حاجی ایسکندرین باغینا گئتدی. آمنه ارینین باغیندا شاهید اولدو، جئیران گؤزلو بیر قادین قدحله آرخدان شراب دولدوردو و قدحی گؤتوروب گولومسه یه رک گوللر ایچینده دایانان ایسکندره سوندو. ایسکندر، جئیران گؤزلویه تحسینله باخاراق قدحی آلدی و ائله بیل ایلک دؤنه دیر ایچیر، شرابین دادینی چکیب کئف ائله دی. کئفلی کیشی سونرا، "اوخو مارالیم، اوخو!" دئدی. جئیران گؤزلو، تارا ال آپاریب سسلندیردی و خومار-خومار اوخوماغا باشلادی: "گلمیشم سنه قوناق، یاریم منه باخ باخ! حاجی منه باخ باخ!...". آمنه ارینین اؤزگه سیله تفریح ائتمه سینه دؤزه بیلمه ییب، آجیقدان قولاقلارینی توتوب باشینی حیرصله باشقا یانا چئویردی. آمنه نین گؤزو بیردن باغین میوه لرینه دوشدو! سانکی حاجیگیلی اونوتدو. تعججوبله هر چئشید میوه یه بیر-بیر یاخیندان باخدی. ندنسه، حاجینین باغینین میوه لرینین هئچ بیری هله یئتیشمه میشدیلر!؟ ماللا قیزی ذهنینده ایشین سببینی آختارماغا باشلادی. حاجینین سوچلارینی بیر-بیر سیرالادی. هردن چاخیر ایچردی! هردن ناماز قیلمازدی! هردن اوروج یئیردی! ... بئله لیکله، آمنه حاجیدان بیلدییی پیس عیبلرین فیکرینه دالدی. بیردن ایسه، تانیش بیر سسین اونو چاغیردیغینی حیسس ائتدی و دؤنرکن قارشیدا حاجینی گؤردو. حاجی جئیران گؤزلویه ال ساخلا دئدی و آمنه یه بئله سؤیله دی: "یاخشی گلیبسن آمنه، سنه بیر چوخ اؤنملی سؤزوم وار ایدی! سن دوز فیکر ائدیردین، من یاخشیلقدان بیر آز اسکیک گتیرمیشم! آمما تانری چوخ ذادلاری باغیشلاییر!! هر کیم دوز دانیشیب ایشینده اینصافلی اولا، یاشیل بؤلگه یه گلیر. حیات یولداشی اوندان راضی اولسادا میوه لری یئتیشیر. شاهید اولدون کی، منه بئله بیر گؤزل باغ وئریبلر، آنجاق هله میوه لری یئتیشمه ییب! منده ایسته ییرم میوه لریم یئتیشسینلر، هم اؤزوم اونلاردان فایدالانیم همده قوناقلیق وئره بیلیم! آمنه، دوزدور من سنی چوخ اینجیتمیشم، آنجاق سن منی عفو قیل!! مندن راضیلیق بیلدیر و نازمازلاریندا منه دوعا ائله کی، منیم میوه لریم یئتیشسینلر! میوه لریم یئتیشن کیمی گلیب سنی قوناق گتیره جه یم!!" آمنه، حاجییا جواب وئرمک ایسته ییردی. آنجاق بیردن یاشیل بؤلگه گؤزو اؤنوندن گئتدی.
آمنه، قیشین سحر چاغیسی نامازا گونده کیندن بیر آز تئز دوردو. یاتاغیندا، گئجه یاریسی گؤردویو یاشیل بؤلگه یوخوسونو دؤنه-دؤنه خاطیرلاییب درین فیکیرلشدی. دوشوندو کی، ائله بیل اؤلومو یاخینلاشیب، آنجاق سانکی جننته گئده جک! بونونلا بئله، آمنه باشکندین ان گؤزل بؤلگه سینده یئرلشن آتاسیندان قالمیش بو ویلا-حیطده یاشاماغی، یاشیل بؤلگه یه گئتمکدن اوستدون توتدو. او دوز رحمتلیک ماللا حسن کیمی ایکی دونیانی توتوشدوراندا، بو دونیادان یاپشیردی! دول آرواد سحر نازمازینین سونوندا اللرینی گؤیه قالدیریب، دؤنه-دؤنه، "آلله حاجینین باغینین میوه لری هئچ زامان یئتیشمه سینلر!" دئیه رک دوعا ائتدی. او گوندن بری ایسه بو دوعانی باشقا دوعالارینا اکله دی.