سینیق کؤرپو

+0 به یه ن

تاریوئردی یاشادیغی بالا شهرده ثابیت و گلیری بابت بیر ایش آختاریردی، آنجاق ائله بیر ایش او طرفلرده یوخ ایدی. یاخینلاری اونا، بؤیوک شهرین آدلیم ایداره لرینین بیرینین باشقانی اولان، کاظیم شیخ اوغلودان یاردیم دیله مه یی مصلحت بیلیردیلر. چونکو، ایندی بؤیوک شهرین تانینمیش سوروملولاریندان اولوب بؤلگه تیلویزیونو گونده گؤسترن دوکتور شیخ اوغلو، بالا شهرده دوغولوب بویا-باشا چاتمیش ایدی. اوندان علاوه، هم تاریوئردینین اؤزونون، همده آروادی جئیرانین اوزاق قوهوملارینداندا اولوردو. شیخ اوغلونو تیلویزیوندا قونوشدوراندا، هر سفر دؤولتلری توتوشدوروب، بیزیم دؤولت کیمی قارا خالقا قوللوق ائدن یاخشی بیر دؤولت ایندییه جن یئر اوزونه گلمه ییب دئیه سونوجلاییردی. یئری گلنده ده، گؤره جک ایشلریمیزله بؤلگه ده کی ایشسیزلییی بیر یوللوق اورتادان قالدیراجاغیق سؤیله ییردی. دوکتور شیخ اوغلو تاریوئردی ایله بالا شهرلیلرین چوخو کیمی، قاراشین، ایری گؤز، اورتا بوی ایدی. ایندی اللی یاشینی گئچیب دولو وضع اولموشدو، گؤزلوک تاخیب داها بوغ-ساققال ساخلامیردی. هر حالدا تاریوئردی چوخلو سالیب چیخدیقدا، بیر گون ائویندن شیخ اوغلونون ایداره سینه زنگ آچیب، سلاملاشدیقدان سونرا اصلی سؤزونو بئله دئدی: "عم اوغلو اوتوز یاشیندایام بیر دانا مدرسه اوشاغیم وار، آنجاق هله ده کی بیر ایش صاحابی دئییلم!! آللاهدان سونرا بیزیم اومودوموز تکجه سیزسیز! منه ایدارزده بیر بابت ایش تاپگینان! هر نه ده ایش اولسا من گؤره رم!!" شیخ اوغلو ایسه، اوولده نئچه کلمه ایداره نین مالی سیخینتیلاریلا ایشین آزلیغیندان سؤیله دی، آمما سوندا قوهوما، "اوچ گون سونرا شنبه گونو گل ایداره یه یئنه بیر یاخیندان دانیشاق!" دئدی. بئله جه گؤزلری ایشیقلانان تاریوئردی باشقاندان دؤنه-دؤنه تشککور ائدیب ساغ اوللاشدی. فرحله نن جوان اوزونو بایاقدان یانیندا اوتورموش بورنو-آغزی کیچیک آروادینا دؤندریب دینمه دن نئچه لحظه ساغ الیله توم بوغونو تومارلادی. سونرا اوندان بتر هیجانلانمیش جئیرانا باشقانین سؤزلرینی دویغولاناراق ایضاحلادی. گنج ار-آرواد اولدوقجا گله جه یه اومودلانیب ائله بیل ایتمیشلرینی تاپدیلار! اونلار بیر موددت اوتوروب میرتلاشاراق شنبه گونو بؤیوک شهره گئدنده نه تهر حاضیرلانماغین یاخشی اولا بیله جه ییندن قونوشدولار. هابئله تاریوئردینین آتا-آناسینین بو قونودا تک اوغلان اوشاقلاریندان اوزاق دوشمه یه راضی دوشمه یه جکلریندنده دئدیلر.

شنبه گونو سحر تئزدن، تاریوئردی حاضیرلادیغی بئش کیلووجان یاخشی بالی ایله بئش-آلتی کیلوو ساری یاغ دببه سینی بیر قارا کیفه یئرلشدیردی. سونرا کیفی گؤتوروب حیطه گتیریب، آراباسینین دالی صاندیغینا قویدو. آردینجا گئچیب آرابانی ایشلتدی. تاریوئردی نیگران گؤرونن جئیرانا آرازین مدرسه سینین گئجیکمه مه یینی وورغولاییب ساغ اوللاشدی. بالاشهردن بیر باشا بؤیوک شهره دوغرو سوردو. بیر ساعات یاریم سونرا، یاشیل بویالی آرابا اوچ میلیوندان آرتیق جمعیتی اولان بؤیوک شهرین گیریشینه  چاتدی. یاریم ساعات گئچدیکده ده ایداره نین گیریش قاپیسیندا دایاندی. تاریوئردی، قاپیدا سورغولاندیقدا ایدره نین محوطه سینه گیرمه ایجازه سینی آلدی. آرامجا اوز یوخاری، بیر قیراغی آغاج اکیلمیش، آسفالت اولان یولویلا اوچ-دؤرد یوز مئتر سوردو و ایداره نین بؤیوک پارکینگه چاتدی. ایلک گؤزونه ساتاشان بوش یئرده پارک ائله دی. تاریوئری دوشورکن، باشینی قووزاییب نئچه لحظه تحسینله تپه اوستونده تیکیلمیش یئر قاتییلا یئددی طبقه لی اولان شوشه لی بینایا باخدی. سونرادان گئچیب قارا کیفی دالی صاندیقدان گؤتوردو. الی دولو کیشی فیکیرلی-فیکیرلی آددیم آتاراق اللی مئترجه اولا بیلن فاصیله نی بینایا دوغرو یئریدی و گل-گئتلی اولان شوشه لی بینایا یئتدی. اؤزو آچیلان شوشه لی قاپیدان ایچری گیردی. بینایا گیرن یئرده یئنیدن سورغو-جواب اولونوب، آسانسورلار گؤستریله رک مقصده ساری یؤنلتیلدی. اوچ دانا بیر-بیرینه تای آسانسور گؤرسنیردی، بیری چوخ چکمه دن آشاغی یئتیشدی. تاریوئردی کیف الینده،  ایکی نفر باشقا آداملا بیرگه، اون نفر یئری اولان گوزگولو آسانسورا گئچیب، ان یوخاری طبقه اولان آلتینجی سایی دویمه سینی باسدی. آردینجا گوزگوده اؤزونه باخاراق الییله توکلرینی سهمانلادی. کیفی گؤتوره رک آسانسوردان دوشوب، تابلولارا باخا-باخا و سالونداکیلاردان سورغولایاراق باشقان شیخ اوغلونون دفترینی تاپدی. تاریوئردی دفتره گیرمه میش، اؤز-اؤزونه فیکیرلشیب، گتیردییینی بیر آز فاصیله لی اولاراق یئره قویوب، گئچیب آچیق قاپیدان بیر ایچری باخدی. دفترده دؤرد نفر نزاکتلی مونشو ماسالاری آرخاسیندا دوموک اولورکن، اوچ نفر موشتریده ساکیت-ساکیت یئرلرینده اوتوروب سانکی اوندان اؤنجه باشقانین اؤزه ل اوتاغینا گئچمه یی گؤزله ییردیلر. تاریوئردی سووقتی باشقانین اؤزونه یادا مونشولرین بیرینه وئرسه یاخشی اولار دئیه آزجا مکث ائله دی. آردینجا ایچری گئچیب یاواشجا ان یاخین مونشونو ائشیگه چاغیریب اؤزونو تانیتدیردی. باشقانا گتیردییی سووقتلری گیزلجه مونشویه تاپیشیریب بوش کیفینی گئری آلدی. تاریوئردی یوبانمادان، دفتره گلیب گؤزله ینلره قوشولاراق باشقانلا نمنه لر دانیشجاغینین فیکیرینه گئتدی. اون بئش دقیقه سونرا، گلدیینین خبرینی باشقانا چاتدیرمیش بایاقکی مونشونون ایشاره سیله آیاغا دوروب، هیجانلی-هیجانلی اونون اؤزه ل اوتاغینا گیریب، اوجادان سایین باشقانی سلاملادی. بیر دفعه بالا شهرده یاخیندان گؤردوگو و گئچن هفته تیلفونلا قونوشدوغو اللی-آلتمیش یاشلی باشقان ایسه یئریندن ترپینیب گولومسه یه رک سلامین جوابینی وئریب، الیله تاریوئردینین قارشی صندلده اوتورماغینا ایشاره ائله دی. باشقان گولومسه یه رک اوزاق قوهوملا کئف-احوال ائدیب آنا یوردلاری بالا شهردن خبرلر سوردو. تاریوئردیده بالا شهردن گیلئیلنیب، آمما هامینین سلامی اولدوغونو وورغولادی. باشقان گئجیکمه دن بو سفر تاریوئردینی باشقا جور سورغو-جواب ائله ییب، بالا شهرلیلرین چوخونا تای اونوندا زحمت چکن بیر اینسان اولاجاغینی دریندن دوشوندو. باشقان یئرینده بیر آز فیکیرلشیب سالیب چیخدی و دیپلوم مدرکی اولان قوهوما ایداره ده اویغون بیر ایش نظرینده توتدو. ایشی دئییب اونا گؤره ایش آختارانین اؤز نظرینده سوردو. اودا تشککور ائدیب چوخ-چوخ یاخشیدیر دئدی. باشقان قرارینی وئردیکده، تیلیفون دسته یینی گؤتوروب پرسونئل مسئولونون نومره سینی توتدو. چارت باره سینده اونونلا قونوشوراق، تاریوئردیدن تعریفلر ائدیب، آردیندان او بؤلومون آرشیو چارتینا بیر نفرین چوخالتما بویروغونو وئردی. بو اون دقیقه لیک گؤروشون آخیریندا، باشقان دویغولانمیش تاریوئردییه دئدی، بیر آیاجان گره کن بلگه لری ایکینجی طبقه ده پرسونئل بؤلومونه آپار و آرشیو اوتاغیندا ایشه باشلا! اولدوقجا سئوینن تاریوئردیده ساغ اولون، وار اولون دئدی. باشقان گئتمکده اولان قوهومو دایاندیریب گولومسه یه رک تاریوئردینین سووقتیندن تشککورلر ائتدی. سونرا ندنسه، قاشلارینی دوینله ییب دئدی: "بورا باخ تاریوئردی، سنه چوخ اهمیتلی بیر سؤزوم وار ایدی! بو ایداره ده چوخلاری اونون-بونون دالیسیجا فقط غیبت ائدرلر، غیبت لاپ بؤیوک گوناهلارین بیریدی!! سن اونلارا هئچ واخت قاریشمایاجاقسان، فیکیرین-ذیکرین فقط اؤز ایشینده اولاجاق! هابئله مسئوللارین نه دئسه لر سن اونلارا قولاق آساجاقسان!!" بو سؤزه تاریوئردی، عؤمرونده ایلک دفعه اولاراق، "باش اوسته باشقان!" دئییب، سونرا اوتاقدان چیخدی. تاریوئری، اوز آشاغی پارکینگه ساری گله-گله، اوزاقدان موبایللا خوش خبرلری جئیرانا چاتدیردی.

تاریوئردی یاخیندان شوسه لی ایداره نی ایلک دفعه اولاراق گؤروردو و کاظیم شیخ اوغلونون اوراداکی وضیعیتیندن ائله بیر خبری یوخ ایدی. اوجا تپه اوستونده تیکیلیش گؤرکملی شوسه لی ایداره شهرین هر طرفیندن گؤرونوردو. اورانین دؤرد یانینین باش طرفلرینه وورولموش ایداره نین خوروزا اوخشار سیمگه سیده لاپ اوزاقلاردان بللنیردی. شوشه لی ایداره نین یئر قاتیندا، قروووللار اوتاغی، بانک، تاسیسات، رئستوران، گیریشی یاساق اولان خیدمت وئرن کامپیوترلر مکانلاری و ییغینجاقلار سالونو نظرده توتولموشدو. هابئله گیریشی قورونان نظارت  اوتاق وار ایدی کی، اورادان ایداره بوتون گؤرونتوله نیب کونترول اولوردو. اوول طبقه ده IT، ایکیجینده اینسانی، اوچونجوده مالی، دؤردونجونوده فنی، بئشینجینده تاسیسات و آلتینیجیندا باشقانلیق ایشلری گؤرولوردو. یئر قاتیندان سووای او بیری آلتی طبقه ده، ساحه لری 40-30 مئتیرجه اولان 30-20 دانا اوتاق وار ایدی. اوتاقلاردا اوچ-دؤرد اوزمان ایشچی هره سی بیر فیرلانان صندل اوستونده ایله شیب، قاباغیندا بیر ماسا ایله بیر بیلگی سایار سیستیمی اولاراق، اؤز ایشینه مشغول ایدی. آنجاق سوروملولار اوچون بؤیوک اوتاقلار نظرده توتولوب، هره سی تک باشینا بیر اوتاقدا اولوردو. بیرده، هر طبقه نین اؤزل بیر مودورو اولاراق، هر مودورون بیر یاداکی ایکی مونشوسو وار ایدی. شیخ اوغلو ایسه، شوشه لی ایداره نین باش مودورو ایدی و ایداره نین ان گؤرکملی اوتاغی ائله اونونکو ایدی. ایداره نین آخیر طبقه سینده، تاریوئردی تازا گؤردوگو باشقانین اؤزه ل اوتاغییلا ایچ-ایچه، مونشولر اوتاغی و جلسه اوتاغی وار ایدی. آخیر طبقه ده همده کونفئرانس ایله ویدیو کونفئراس اوتاقلاری سهمانلامیشدی. شوشه لی ایداره نین ایشینده گلدیکده، موخابرات و اینتئرنئت ساحه سینده چالیشان، دؤولته باغلی اولان چوخ گلیرلی بیر ایداره  ایدی. ایداره پروژه لرین بعضیسینی اؤزو گؤروردو، بعضیسینیده آنلاشما اوزره ائشیک شیرکتلره تاپیشیریردی. دئمک اولار، ایداره نین گؤره وی اوچ میلیونلوق شهر ایله بوتون اون میلونلیونلوق بؤلگه نین الکترونیک ایرتیباطلارینی ساغلاماق ایدی و بو ایشلری اینحیصاری اولاراق گؤروردو.  

تاریوئردی قورا پیشیرن آیینین ایچینده، گؤز، قولاق، قلب و باشقا دوکتورلره گئدیب موعاینه لر اولوندو و بوتون ساغلیق بلگه لرینی آپاریب ایشچیسی اولاجاق ایداره نین پرسونئل بؤلومونه وئردی. موعتاد اولمادیغی اوچونده سیناقلار وئریب نتیجه سینی ایداره یه بللی ائتدی. هر بیر ذادا ایراد توتا بیلن قوروما بؤلومو ایله ایشچی سئچیم قورومونون ایشلری ایسه، تاریوئردی اوچون چتین اولمادی!! تاریوئری او بیر آیدا، آتا-آناسینی کوسدوره رک بالا شهرده کی گؤزه ل و بؤیوک حیطینی دیر-دیمزینه ساتدی و عوضینه، بؤیوک شهرین یوخسول بؤلگه لرینین بیرینده، موجتمع ایچینده، تک اوتاقلی بالاجا بیر آپارتومان آلدی. بؤیوک شهره داشینیب آپارتومانینی دوشه دی و بول-بول آرزولارلا شولوغ شهرده یاشاماغا باشلادی. یوبانماداندا، اوغلو آرازی یاخینلارینداکی ایبتیدایی مدرسه سینه یه آپاریب، ایکینجی کیلاسا آد یازدیردی.

قویروق دوغان آیین اوول گونو، تاریوئردی سحر تئزدن موبایلینین زنگی ایله یوخودان دوردو. ایداره یه گئتمک اوچون حاضیرلاشدی. تختینده درین یوخودا اولان آرازین یاواشجا اوزوندن اؤپدو و اونو ایشیقلی گؤزلرله یولا سالان جئیرانین دوداقلاریندان اؤپدوکده ساغ اوللاشیب ائودن چیخدی. تاریوئردی آراباسینی ایشله دیب اولو تانرینی یاد ائده رک ایلک دفعه اولاراق سحری موجتمعدن ایش یئرینه ساری یولا دوشدو. ایرمی دقیقه یول گلدیکده ایسه، شوشه لی ایداره یه چاتیب پارکینگه گئچیب پارک ائله دی. تازا ایشچی دوشوب، تازا یئتیرن ایشیچیلره قوشولاراق شوشه لی بینایا دوغرو یئریدی. شوشه لی قاپیدان گئچنده ساعات هله یئددی یاریم اولمامیشدی. گیرنده ماراقلاندیران بیر بؤیوک پوستر گؤزه چارپیردی. او پوسترده علی حضرتلریندن بیر حدیث یازیلیب ایکی اوزلولر اولدوقجا پیسلنمیشدی. یئتیرن ایشچیلر گیریشلرینی بللندیرمک اوچون سیرایلا قوراشدیریلمیش سکگیز دستگاهین بیرینده بارماق ووروردولار. ایکی قرووولدا شوشه لی اوتاقلارینین ایچیندن گل-گئتلره نظارت ائتمکده ایدیلر. تاریوئردی اوتاق ایچینده کی قروووللارین بیرینه یاخینلاشیب، آدینی باجادان اونا بیلدیریب، بوگوندن ایشه گلمیشم سؤیله دی. قرووول ایسه آدییلا گیریش زامانینی اؤزل فایلیندا یازدیقدا، ایشینین دالیسیجا دوشوب تئز آدینی بارماق وورولان دستگاهلارا تانیتدیر دئدی. تاریوئردی، یئددی نفرله بیرلیکده آسانسورا میندیکده ایکینجی طبقه نین دویمه سینی باسیلمیش گؤردو و بیر آزدان ایکینجی طبقه ده یئننلرله بیرگه آسانسوردان چیخدی. تازا ایشچی اوولده هیجانلی-هیجانلی سوروملوسو پرسونئل مسئولونون اوتاغینا گئتدی، آنجاق مسئول هله گلمه میشدی و قارشی طرفده بئش اوتاق فاصیله لی اولان آرشیو اوتاغینا گئت دئدیلر. تاریوئردی، ایش یئری اولاجاق ایشچیلرین پرونده لری ساخلانیلان بؤیوک آرشیو اوتاق ایله اوتاقداشلارینی گئچن آی بلگه لرینی گتیرنده اوچ دؤنه گؤرموشدو. بونلا بئله، یئنه اوره یی دؤیونوب نئچه لحظه اوتاق قاپیسیندا دایاندی. هر حالدا قاپینی دؤیوب آچدی و دایانیب آرالیدان قارشیداکی پنجره طرفینده اوز-اوزه اوتورموش امکداشلاری سلاملادی. آز قاباق یئتیشمیش جلال ایله قهرمان باشقانا اوخشار تازا اوتاقلاشالارینی گؤررکن آیاغا دوروب گولومسه یه رک قاباغینا گلدیلر. اونا بویورون-خوش گلدینیز دئدیلر. تازا ایشچیده زحمت چکمه یین دئیه رک یئیینله ییب سابیقه لی اوتاقداشلاریلا بیر-بیر گؤروشوب کئف-احوال ائتدی. داها یاشلی گؤرونن باشینین اورتاسی داز جلال، یئنی اوتاقداشا نظرده توتولان اورتایا قویولموش اوزو پنجره یه باخان ماسا-صندله ایشاره ائله ییب، بویورون ایلشین سیزیندی دئدی. اؤزو چوپور قهرمان ایسه اوتاقداشا یئنه خوش گلدین ائله دی. بؤیوکلر ایلشدیکده، تازا ایشچیده اوتاناراق اؤز ماساسینین آرخاسیندا اوتوردو. ساغینداکی جلال قئید ائله دی کی، ائله بوگونIT  دن گلیب بیلگی سایار سیستیمینده قوشاجاقلار. سولداکی قهرماندا جلالین سؤزونو اونایلاییب ایضاحلادی. اوول واختدا، ایداره نین صوبحانه چاغ ایدی. صوبحانه ایله ناهاری بعضیلری ایداره نین رئستورانیندان آلیردیلار. بعضیلریده اؤزلری ائولریندن گتیریردیلر. امکداشلار ایکیسده ماسالاری اوستونه قویدوقلاری یئمکلره ایشاره ائدیب، تاریوئردییه بویورون صوبحانه نی بیرگه یئیک دئدیلر. او ایسه، صاباحدان منده غذا گتیررم دئییب، دوروب رئستورانا گئتدی. اوول گون، جلال سیرا-سیرا اوتاقداکی ایشکافلارا دوزولموش پرونده لره گؤره یئنی امکداشلارینا توضیحلر وئریب اؤنملی تاپیشیریقلار تاپیشیردی. قهرماندا کامپیوترده گؤره جک اؤنملی ایشلری امکداشا آنلاتماغا چالیشدی. یئنی امکداشدا، پرونده، سند، سندین یئری و اونو نه جور ایسکن ائله ییب فایل ائتمه یی بیر قولای بیلدی. هابئله اوتاقداشلار تاریوئردینی اورانین باشقا گؤرولریله و شوشه لی ایداره نین یاسالاریلا بیر آز تانیش ائتدیلر. بئله جه، او  اوول گون خاطیره لریله ساعات اون آلتیدا باشا چاتدی. گونلر ایسه، او گونه تای تئز-تئز گلیب گئچدیلر و آی باشی آیلیق فیشلری چاپ اولاندا، تاریوئردینین ایلک آیلیغی بیر میلیون تومنه یاخین اولدو. تاریوئردی، چوخ چکمه دن ایشلرین یول-یؤندمینی یاخشیجا تاپیرکن ایداره نی بالا-بالا منیمسه ییب، اونا تاپیشیریلان گؤرولری باجاریقلا یئرینه یئتیردی.

ثابیت و گلیری بابت ایشی اولان تاریوئردینین ایشلری بیر ایلجن چوخ یاخشی قاباغا گئتدیلر. گئتدیکجه ایداره ده هامی اونو یاخیندان تانیییب ایشیله داورانیشیندان راضیلیق ائتدیلر. بونونلا بئله هئچ کیم تازا ایشچینین یانیندا شوشه لی ایداره نین باشقانیلا مودورلریندن سؤز سالماغی مصلحت بیلمیردی و  دانیشماغا مجبور اولاندادا سؤزلرینی سانسورلاییردی. اؤزللیکله ده ساغ-سولونداکی اوتاقداشلاری او گلندن بری آرخایین دانیشماییب، شیخ اوغلو باره سینده اوره ک سؤزلرینی دیله گتیره بیلمیردیلر.  

شوشه لی ایداره نین ایشچیلری فورصت تاپاندا شیخ اوغلودان گؤردوکلریندن و  ائشیتدیکلریندن دانیشیردیلار. هابئله اونون تیلویزیونداکی سؤیله دیکلریندن دئییب حرارتله یوروملاییردیلار. دوکتور شیخ اوغلونون یابانجی مارکالی بیر گؤرکملی شاسی اوجا آراباسی وار ایدی، شوشه لی ایداره ده بیر زانتیا آلیب اونون آیاغی آلتینا سالمیشدی. شیخ اوغلو شهرین ان گؤرکملی شهرجییی اولان آیلار شهرجییینده ده یاشاییردی. دئییردیلر، باشقانین ائوینین یانیندا طاغوت یاشاییشینی گؤسترمک اوچون تاریخ کیتابلاریندا چکیلمیش، گئچمیش دؤنمده کی شاهین کاخی بیر کند ائوینه اوخشار گؤرولور! باشقان قاباقجالار، باشکند ایله باشقا بؤیوک شهرلرده ده ایشله میشدی. آنجاق بو ایرمی ایلده هر هارادا اولموشدو، فقط ائله باشقان اولموشدور! اونون، نئچه-نئچه باشقا-باشقا یئرلردن گلیری وار ایدی. آیلاردا بورجلار سالدیریردی. اونلار اؤنملی کومیته ده اویه اولوب، اونلار مشهور اورقانین سهاملیسی ایدی. هفته ده بیر دؤنه اوچاقلا باشکنده ماموریته یوللانیردی، هردنده ده تورکییه، چین و آیری اؤلکه لرده ماموریتده اولوردو. گزمک اوچون ایسه، دونیانین مشهور گزمه لی یئرلرینه گئدیردی. بئله دونیاسینی تاپمیش شوشه لی ایداره نین باشقانی، سون منزیلیده هئچ زامان اونوتماییب اورادادا سعادت آختاریردی. باشقان ناهار چاغلاری ایداره نین اوچونجو طبقه سینده یئرلشن نامازخانایا گلیب، همیشه گئچیریلن جماعت نامازینین اوول سیراسیندا ایداره ماللاسینین آرخاسیندا حاضیر اولوردو. نامازدان سونرا دانیشاندا اخلاقدان دئییب، کربلا ایله وطن شهیدلرینی  اورکدن آنیردی. بو قونولاردا ماللاداندا آرتیق صؤحبت ائده بیلیردی. بونلارا باخمایاراق، ندنسه تک اولاندا سلام وئرمه سئیدین، سلام وئرمه ییب باشینی اوسته توتوردو!؟ باشقان، سؤزده یوخسوللاری دستکله ییب، اؤلکه نین ان بؤیوک دوشمنی ساییلان وارلی آمئریکانی باشاردیقجا پیسله ییردی، آمما ندنسه بؤیوک اوغلو آمئریکادا اولوب اورانین وطنداشی ایدی!؟ بؤیوک شهرده یاشایان بالاجا اوغلودا باشکند قیزی آلیب یاخینیندا یاشاییردی. ایکی قیزینی ایسه باشکندلی تانینمیش سیاستچیلرین اوغلونلارینا وئرمیشدیر. اوولر اوزون ساققالی و تسبئحی وار ایدی. آنجاق بو چاغلار همیشه باهالی موبایلی الینده اولورکن، بوغ-ساققال ساخلاماغی مصلحت گؤرموردو. بونونلا بئله دانیشیقلاریندا دین ایله اخلاق قونوسونداکی قدیم سؤزلرینی یورولمادان تیکرار ائدیردی. باشقانین قوناقلیقلاری ایسه دنیز آدلی شهرین ان بؤیوک رئستورانی و آیری باهالی رئستورانلاردا اولوردو.

بونلاردان ائله خبری اولمایان تاریوئردی، ایشلرینی دوغرو-دوزگون گؤرمه یه چالیشاراق هامییلا اردم و نزاکتله داورانیردی. او ایسته ییردی دالیسیجا هئچ کیم دئمه سین ده، شیخ اوغلو گؤر کیملری ایداره یه گتیریب! بالا شهرده هردن سیقار چکن تاریوئردی، بو عادتینیده شوشه لی ایداره یه گلندن بری بیر یوللوق بوراخمیشدی. تاریوئردی اوول ایل ایشیله گلیریندن راضی اولدوقدا، اؤزونه وظیفه بیلیب هردن زنگ آچیب قوهوملاری شیخ اوغلودان تشککورلر ائدیردی. جئیرانلا آرازیدا وضعیتدن راضی و بؤیوک شهر یئریشنی گونو-گوندن آرتیق منیمسه مکده گؤروردو. او ایل تاریوئردیگیل گئجه لر ائولرینده تیلویزیوندا شیخ اوغلونو ایزله یرکن دانیشیقلارینا دیققتله قولاق آسیردیلار. باشقانین ایسه هر یئرده دوزلوکدن سؤز آچماغینی گؤروردولر. بیرده گئجه لر، تاریوئردی جوان حیات یولداشینا ایداره ده ائشیتدییی، بؤیوک شهرده باش وئرمیش عاغیلا سیغماز کؤپک اوغلولوقلارلا خیانتلردن دانیشیب، گنج و گؤزل حیات یولداشینی شهرده آییق سالماق و خطرلردن ساغیندیرماغا جهد ائدیردی. کیشینین ائله صؤحبتلری قورتاراندا دؤنه-دؤنه ناراحات-ناراحات آرزولاییردی، اولو تانری هئچ کیمین باشینا بئله یامان ایشلری گتیرمه سین!!

تاریوئردینین بیر ایلی تازا سوووشموشدو کی، اوروجلوق آیی باشلاندی. دؤرد-بئش یوز نفر موسلمان چالیشان شوشه لی ایداره ده بلکه ده آز آدام اوروج توتوردو! آنجاق، اوروجلوق دبلرینین هامیسی بیر-بیر قورونوردو. گونده سحرلر نامازخانادا قورآن اوخوما مراسیمی گئچیریلیردی، هر ناهار نامازیندان سونرادا اؤزل دانیشیقلار اولوردو. اوروجلوغون اون بئشینه ایسه، اؤتن ایللر کیمی، ایداره بوتون ایشچیلری عاییله لریله بیرلیکده ایفطارا چاغیرمیشدی. اون بئشی گئجه سی ایشچیلر بؤیوک شهرین مشهور دنیز رئستورانینا قوناق ایدیلار. رئستورانین بؤیوک سالونوندا هارادان-هارا ماسا-صندل دوزولموش، اوستلرینه چئشیدلی یئمک-ایچملر قویولموشدو. قادینلار بیر طرفه، کیشلرده بیر طرفه توپلانمیشدیلار. تاریوئردیده آرواد-اوشاغینی گؤتوروب گلمیشدی و آرازی اؤز یانیندا گؤتورموش، جئیراندا قادینلارا قوشولموشدو. او گئجه ایفطاردان سونرا، باشقان سس اوجالدان آراجییلا گلنلردن تشککور ائدیب، بئش دقیقه موددتینده اوروج توتمانین فایدالاریلا ثوابلرینی اؤزئتجه سیرالادی. آردینجادا دوشمن آمئریکانی لعنتله دی. سوندا، ایداره ماللاسی دوعالار ائتدی. بئله جه ایکی ساعاتدان آرتیق سورن مراسیم قورتولوب، جماعت گئتمه یه حاضیرلاشدی. تاریوئردی ایله آراز قاپی قاباغیندا جئیرانلا بیرلشدیلر. سونرا قونوشاراق ائشیگه گلیب اورالاردا بیر موددت دؤزدولر. شیخ اوغلویلا آروادی خئیران خانیم چیخاندا، تاریوئردیگیل اونلارا دوغرو یئیینله دیلر. گنج ار-آرواد سایغیلا یاشلیلارا سلام سؤیله ییب، باشقانگیلدن یاردیملارینا خاطیر بول-بول تشککور ائتدیلر. سونرادا گئجیکمه دن گولومسه یه رک ساغ اوللاشیب آیریلدیلار. تاریوئردیگیل شیخ اوغلونون یاخیندا پارک ائتدییی شاسی اوجایا اؤتری بیر باخدیلار و گئچیب پارکینگده پارک ائتدیکلری آردیلارینا دوغرو یؤنلدیلر.

ایفطار وئریلن گئجه نین صاباحیسی، شیخ اوغلونون مونشوسو ایلک دفعه اولاراق تاریوئردییه زنگ آچیب باشقانین اوتاغینا چاغیردی. گؤروشده، باشقان اوندان هامینین راضیلیق بیلدیردییینی وورغولادی. سونرا گولومسه یه رک گنج ایشچییه اؤزه ل ایشلر تاپیشیرماغی و ماموریتلره یوللانماغی اؤنردی. ایشچیده بئله گلیری آرتیقراق اولاجاق ایشلردن چوخ-چوخ راضی اولاجاغینی و داهادا آرتیق سایین باشقاندان میننتدار اولاجاغینی سؤیله دی. بو چوخ قیسسا اولان گؤروش قورتولاندا، تاریوئردی سئوینه رک اوتاغینا دؤنوب، آرتاجاق گلیرلره و دورومونون داهادا یاخشیلاشاجاغینا فیکیرلشدی. شیخ اوغلوگیل، اوروجلوق قورتولمامیش تاریوئردینین عاییله سینی اؤز ائولرینه ده قوناق چاغیردیلار. باشقان او گئجه قوهوملاری گؤرنده آدامین اوره گی اولدوقجا آچیلیر دئدی و آرازی گؤرنده اؤز اوشاقلیغیم یادیما دوشور سؤیله دی. باشقان ایله خئیران خانیم تاریوئردیگیلله داهادا آرتیق بیر آرایا گلمک ایسته دیکلرینی سؤیله دیلر. تاریوئردیگیلده بؤیوکلردن تکجه تشککور ائده بیلجکلرینی دئدیلر. او گئجه قوناقلیقدان ائوینه قاییتدیقدا، تاریوئردی بوغونو، باشقان و امکدارلارینین چوخ کیمی، تکدن قیرخدی و بوس-بوتون بؤیوک شهرلیلره اوخشادی. او اؤز-اؤزونه داها بیرده بوغ-ساققال ساخلامایاجاغام دئدی.  

او آیدان بو یانا تاریوئردینین آییلیغی گئت-گئده گؤزه گلیمجه سینه چوخالدی. هابئله، شیخ اوغلو آیدا بیر دفعه تاریوئردیگیلی اؤز ائوینه یئمک-ایچمه یه قوناق چاغیردی. بیر دؤنه ده تاریوئردینین قوناغی اولوب وضعیتینی یاخیندان گؤردو. بو گؤروشلرده شیخ اوغلو آرازا باهالی ور-وساییل آلیب اونو عمی سسله ین گؤزل اوغلانا وئریردی. بیر یانداندا ایداره ده، دالبادال تاریوئردی گونلر مامویت اوچون باشکند ایله باشقا اوزاق شهرلره یوللانیردی. یئری گلنده شیخ اوغلو تاریوئردییه، تئزلیکله سنی اؤزومله تورکییه یه ده آپاراجاغام دئییردی.

تاریوئردی اؤز یئری اولان آرشیو اوتاغیندا داها چوخ آزراق گؤرونوردو. او اوتاغیندا اولاندا نیگران اوتاقداشلاری دوروموندان سوروشوردولار. اوتاقداشلار تاریوئردییه وورغولاییردیلار کی، آییق اولمالیسان هئچ کیم بوش-بوشونا بیرینه بیر بئله یاخشیلیق ائتمز!! قوهوم اولسالاردا بئله، اوتاقداشلار هر کیمین اؤز تای-توشویلا گل-گئت ائتمه سینی مصلحت بیلیردیلر. آنجاق بئله سؤزلر تاریوئردییه فایدا وئرمیردی! ائله بیل منیم ایره لییه گئتمه ییمی گؤزلری گؤتورمور دئیه دوشونوردو. تاریوئردی فیکیر ائدیردی، اونا ایش تاپیب بورا ییئتیرن بؤیوک آدامین چاغیریشینی هئچ زامان ردد ائده بیلمه یه جک. تک اولاندا نه قدر فیکیرلشیردی، باشقاندان یاخشیلیقدان باشقا بیر شئی گؤرمه دییینی آنلاییردی.

گلیری ایکینجی ایلده ایکی قات آرتان تاریوئردی، قاباقکی ایلده تک اوتاقلی آپارتومانینی ساتماغا و بانکدان وام گؤتوروب شهرین داها یاخشی منطقه سینده ایکی اوتاقلی بیر آپارتومان آلماغا فیکیرلشیردی. تاریوئردی بیلیم یوردلاری سیناغینا آد یازدیریب لیسانس آلماغیدا دوشونوردو. هابئله آرازی داها یاخشی بیر مدرسه یه یازدیرماق هئچ زامان فیکریندن چیخمیردی. آنجاق، جئیران ندنسه بالا-بالا اوندان ناراضی گؤرونوردو!؟ خانیم گئت-گئده سویوق داوراناراق همیشه قاش-قاباقلی اولوردو. تاریوئردی نه قدر فیکیرلشیردی جئیرانین داورانیشینین ده ییشیلمه سینین سببینی تاپا بیلمیردی. خانیمدان سببینی سوروشاندا حیرصله جوانلیغیم سنین ائوینده پوچ اولدو دئییردی. گنج قادین، تاریوئردینین یوخسول اولدوغونو هی باشینا چالیب کوسگونلوک و داعوا چیخیردی. قادین نهایتده ده، "من بوشانیرام!" دئدی. بئله بیر سؤزو گؤزله مه ین تاریوئردینین دورومو ایسه اوندان سونرا پوزولماغا باشلادی. تاریوئردی ارک ائتدیی قوهوم-تانیشلاریندان و حتتی شیخ اوغلوگیلدن یاردیم اوچون آراچیلیق ائتمکلرینی دیله دی. آنجاق هامینین چاباسی یئترسیز قالیب، آرواد فقط بوشانماق ایسته ییر دئدی. سانکی، تاریوئردینین خوش گونلری بؤیوک شهرده ایکی ایلدن آرتیق سورمه یه جک ایدی! ار-آروادین ایشلری آخیردا محکمه یه چکدی. محکمه ده بیر ایل یاریم سوردو. بیر آدلیم وکیل توتموش جئیران کبینینی آرازا گؤره باغیشلادی، آنجاق اوغلوندان آیری دوشمه یه راضی اولدو و محکمه نین نتیجه سی اوزره بوشاندی. محکمه چاغلاریندا، تاریوئردییه اؤزه ل ایشلر تاپیشیریلماییب، ماموریته یوللانمادی. ایشچی هئچ، ایداره ده کی اؤز ایشلرینه دوغرو-دوزگون یئتیشنمه دی. همیشه ایداره یه گئج گلن مسئواللاریدا اونونلا هئچ دوز دئمه دی. هرحالدا تاریوئردی فقط وظیفه اوزره گیج-گیج آرشیو اوتاغینا گلیب گئدیردی. شوشه لی ایداره ده تکجه جلال ایله قهرمان اونون یامان حالینی دوشونوردولر. بو آرادا جئیران، نم-هارادان پول تاپیب باشقانگیلین یاشایان آیلار شهرجییینده بیر آپارتومان ایجاره ائدیب دؤولتلیلر کیمی گئیینه رک یاشاییردی. تاریوئردی هردن گئدیب چاره سیز-چاره سیز بوشانمیش آروادینی گودورکن دورومونو آراشدیریردی و آرازا گؤره ده اولموش اولسا آروادین بیر گون پئشمان اولاجاغینی سانیردی. گودن گونلرین بیر آخشام باشیسی بیر تانیش قارا شاسی اوجا آرابانین او طرفلرده گل-گئت ائتدییینی گؤردو. اومود و هیجانلا دئدی بس، قوهوملاری شیخ اوغلوگیل اونلارین آراسیندا هله ده آراچیلیق ائتمه گه چالیشیرلار. بیر سحرده ده بیر تانیش آغ رنگلی زانتیا گؤردو. زانتیا گؤرن گونون صاباحیسی، قوروما بؤلومونون ایشچیلرین بیری، اونا بیر گیزلی مئساژ گتیردی: "شیخ اوغلونون بویوردوغونا گؤره، بیز گیزلیجه آروادووون تیلفونو و موبایلینی کونتورولا قویموشدوق! چوخداندی بیر آیری کیشی ایله وار!! بیر یوللوق اونو بوشلاماغین مصلحتددی!" بئله لیکله ده اوزولن تاریوئردی آروادین دالیسیجا گئتمه ییندن اولدوقجا پئشمان اولدو.

بوشانماقدان بیر ایل سوووشار-سوووشماز، بایرام قاباغی شوشه لی ایداره ده خبر یاییلدی کی، شیخ اوغلو تاریوئردینین دول آروادینی آلیبدی!! اوتاقلاردا ایشچیلر، پیچیلدایاراق آرواد شاسی آلچاقدان دوشوب شاسی اوجایا میندی سؤیله ییردیلر. بعضیلریده دئییردیلر، آلماییب صیغه ائله ییبدی و نه چوخدور باشقانین بئله صیغه لری!! سؤزلر همن گلیب تاریوئردینین قولاغینادا چاتدیلار. اونون ایسه یانیب اودلانماقدان باشقا، آیری چاره سی یوخ ایدی. تاریوئردی قاش قاباقلی ساکیت-ساکیت اونا دوستاق اولموش شوشه لی ایدره یه گلیب گئدیردی. ننگ دامغاسی وورولانلار کیمی اولموش ایشچی ائوینه دؤننده آراز اولماسایدی، بلکه ده اؤزونو اؤلدرردی. تاریوئردی ایداره ده کی باخیشلارا دؤزه بیلمه ییب، اورادان چیخیب شهرده موسافیر داشیماغا یادا باشقا هر نه بیر ایش گؤرمه یه فیکیرلشیردی. تاریوئردی او گونلرین بیرینده، اوتاقداشلارینا بایرامدان سونرا ایداره دن گئده جه یینی آچیقلاییب، کؤپک اوغلو باشقانلا اسکیک جئیرانی اؤلدوره جه یینی دیلینه گتیردی. آنجاق تجروبه لی اوتاقداشلار، بؤیوک شهرده نه بولدو بئله ایشلردن سؤیله ییب، امکداشا توختاقلیق وئرمه یه و اونو آییق سالماغا چالیشدیلار. جلال سولموش امکداشینین گؤزلرینه باخاراق وورغولادی، سنین اوولده بیر دوز قاضییا شیکایت ائتمه یه احتیاجین وار ایدی، آنجاق بو شهرده تک بیر دوز قاضیدا تاپماق اولماز!! او ناراحات-ناراحات آرتیردی: "عزیز قارداش بونودا دئییم کی، ایندی زامان چوخ-چوخ ده ییشیلیب!! هئچ کیمه بیر سؤز دئمک اولمور! بؤیوک شهرده جوانلار بوگون عقد ائدیرلر، صاباحلاری بوشانیرلار! هئچ کیمده اونلارا بیر سؤز دئیه بیلمیر! امکداشلاریمیزین بیری دئییردی، قیزینی بوراجان اوچ دفعه بخت ائوینه یولا سالیب، هر دفعه ده تازا جاهازلار آلیب!! بیریده دئییردی، قورخودان دول قیزینا دئیه بیلمیر گئجه لر ائومیزه گل، آیری ائولرده قالما!! سنده ایندی قارداش اونلاری بوراخ و اؤز یاشاییشیندان یاپیش! بؤیومکده اولان آرازدان مواظیب اول! قویما پیس یولداشلارلا دوست اولسون!" دلیل-نصحیتی ائشیدن تاریوئردیدن بیر سس چیخمایینجا، قهرمان سؤیله دی: "دوغرودان جلال بی دئین کیمی اولوب! آروادی بوشانمیش امکداشلارین بیری، بیر دول قادینا ائلچی گئتمیشدی، او دئمیشدی بوراجان من دؤرد دؤنه اره گئتمیشم!! بیری خوش تیب ایدی، آمما چیخارسیز ایدی! بیری کئچل، چیخارلی ایدی! بیری پوللو، آنجاق قلبی قارا زهله سیز ایدی!! سونداکیدا گنج اؤیرنجی ایدی! امکداشیمیزدا گوله-گوله من بیر یول آرواد بوشامیشام بیر اره گئدنی آختاریرام دئمیش!! قادین قاقیلدامیشدی، امکداشدا چایینی ایچیب دورموشدو!!" جلال دئدی: "عزیز قاداش بؤیوک شهرده بئله خبرلر وار! آنجاق بیز هله چوخونو هئچ ائشیتمیریک! سن شوکور ائله کی، سنین آروادین یئنه اون ایل قالیب!! بیلیسن عزیز قارداش بیز کیشیلر چوخراق کیشی حیسسیله دانیشیریق، اونا گؤره آروادلارین فیکیرلرین بیلمیریک!! چوخ باغیشلایاسان تاریوئردی، بلکه سنین آروادین سنی هئچ اؤزونه لاییق گؤرموردو! بلکه بیر یول گلمیش بو دونیادا داها آرتیق یاخشی یاشاماق ایسته ییردی!! اوندا نئیله مه لی ییک؟! من بئله دوشونورم کی، سیز گل-گئت ائدندن سونرا باشقان منیم آروادیم گره ک بورنو یئکه خئیران تکین یوخ بلکه بورنو کیچیک جئیران تکین اولسون دئمیش!! جئیراندا منیم اریم شیخ اوغلو کیمی وارلی اولمالیدی دئمیش!! قارداش نه قدر بیز سنه دئدیک شیخ اوغلوگیلله گل-گئت ائتمه!؟ آلله حاققی توتوشدورما هر اینسانی روسوای ائده بیلر!!" تاریوئردی قیزارسادا یئنه بیر سؤز دئمه دی. قهرمان دئدی: "بوگون دئییرلر آروادین حاققی وار کیمه ایسته ییر گئتسین، هاچان ایسته سه  ده بوشانسین! آمما گؤرورسن کی بؤیوک شهرده نه تهر هر کؤپک اوغلولوق و خیانتده عادی اولوب! هئچ کیمده اوتانماق قالمیر!!" ایلین سون چرشنبه سینین خلوت گونونده، ناهاردان سونرا او خلوت واختدا، جلال ایله قهرمان ماسالاریندان ترپنمه دن شوشه لی ایداره نین باشقانیندان دئمک ایسته دیکلری حیکایه لری آرد-آردا سؤیله مه یه باشلایب نئچه ایلدن بری اوره کلرینده قالدیغی سؤزلری بئله جه بوشالتدیلار.

جلال دئدی: "شیخ اوغلو دیپلم مدرکی ایله بوردا ایشه یازیلمیشدی، آمما سونرادان دالبادال لیسانس، یوکسک لیسانس و دوکتورلوک درجه سینیده آلدی! اؤزوده اعتیباری آز اولان بیلیم یوردولاریندان، بیزیم مودورلرین چوخو کیمی! شیخ اوغلو تک بیر کیلاسادا گئتمه دی، بوتون تئزلرینیده او-بو یازدی! آنجاق بؤلگه ده اونو پروفئسور سسله یینلرده وار!!"

قهرمان دئدی: "شیخ اوغلو گونلر گئدیب دایانارمیش قدیمکی مودورون ائوی قاپیسیندا، فقط اونا گؤره کی، اورادان گئچنده صمد اوغلو اونو گؤرسون! گؤرنده بودا ایکی قات اییلیب سلام وئررمیش!! بئله لیکله من سنه نوکرم دئیرمیش!! او زامانلاردان سونرادا صمد اوغلو بونو اؤزونه یاردیمجی سئچدی. بیزیم شیخ اوغلودا مسئوللوقدا باجاریغینی گونو-گوندن آرتیق بوتون اؤلکه یه بللی ائتدی! مودورلرین چوخو کیمی، آشاغیلارا یوخ و یوخاریلارا هن دئدی، آشاغیلاری قاپیپ یوخاریلارا ازیلدی!!"

جلال دئدی: "بو سؤزو شیخ اوغلونون اؤز آغزیندان ائشیدیبلر. شیخ اوغلو مککه ده اولاندا ائله بیلیرمیش کی، ایداره نین بوتون ایشلری ایندی یئرده قالیب!! آنجاق حاجی قاییداندا گؤرموش کی، یوخ بابا تک بیر ایشده یئرده قالماییب! مونشولورلری اونون هر ایشینی لاپ دوزگون یئرینه یئتیریبلر!! دئمه بس، باشقان اونا یازیلان بوتون کاغاذلارا یونگولواری بیر شئیلر یازیب بئش یاردیمجیسیندن بیرینه یؤنلندردی. آمما بو سفر ائله سؤزلر یازیلمادان، مونشولر کاغاذلاری یاردیمجیلارا تاپیشیرمیشدیلار! هئچ بیر ایشده قایداسیز اولمامیشدی!"

قهرمان دئدی: "اوولده ماشینی یوخ ایدی. صمد اوغلویا یاردیمجی اولاندا، ایداره نین بیر جیبی وار ایدی، اونو قییمتیندن چوخ آشاغییا و لاپ یونگول قیسطلارلا ایداره دن اونا وئردیلر! آمما ایندی باهالی-باهالی ماشینلارا مینیر! شیخ اوغلو اوولده چوخدا بئله دئییلمیش، ائله بیل باهالی ور-وساییل اونون داورانیشینی ده ییشدیلر!!"

جلال دئدی: "بیر دفعه ایداره مودورلرینین بیرینین قایناناسی اؤلموشدو، ایداره ده یاس مراسیمینه گئتمک اوچون ایکی دانا اوتوبوس توتموشدو: بیرینی آروادلارا، بیرینیده کیشیلره. دئییردیلر، باشقانین آروادی خئیران قادینلار اوتوبوسونا چیخاندا، گؤرموشدو ماشین دولودو و هئچ کیمده یئریندن ترپنمیر!؟ اودا نئچه قادینا تای مجبور اولوب بیر موددت آیاق اوسته دورموشدو! آمما بو وضعیته دؤزنمه ییب قیشقیرمیشدی، منیم اریم سیز ارلریزین باشقانیدی، سیز گره ک آیاق اوسته دوراسان من اوتورام!! اوندا بیری آیاغا قالخیب باشقانین آروادی یئرینده اوتورموشدو."

قهرمان دئدی: "شیخ اوغلو او بیری بئش مودورلرین هره سینی بیر مییللت وکیلینین سیفاریشیله قویوب! عوضینه یئری گلنده مجلسده اونلاردا شیخ اوغلویا کؤمک ائله ییرلر. بو مودورلر شوشه لی اداره دن آلله بیلیر نه پوللار آلیرلار! بانکلاردان نه آز بهره لی واملار گؤتورورلر! آلله ائله بیل بالام دئییب بونلارا!؟ من بیلن هامیسی آیلار شهرجیگینده بورجلار سالدیریب، اوردا هره سینین نئچه دانا دوکانی وار!"

جلال دئدی: "بیر دفعه ایداره باشقانلارا ماشین وئریرمیش، چارت دوزلدیب بیر نفری اورا باشقان وورموشدولار، سونرادا ایسته دیکلری آداما ماشین وئرمیشدیلر! اون گون سونرادا باشقانی گؤتوروب چارتی تازادان پوزموشدولار!! بیر دفعه ده ایداره دوزولدیب سفاریشله باشقا ایداره دن گلن آدامی اورا باشقان قویدولار! شیخ اوغلویا بو موضوعلاری بیر نفر شوخلوقجا دئمیشدی، اودا جواب وئرمیشدی بیر نفر اوچون باشکندده وزیر چارتی آچماغی مصلحت گؤرورلر، اولان سن نه دئییرسن!؟ دئمه لی چارت و قانون بونلارین الینده تکجه اویونجاقدی!!"

 قهرمان دئدی: "ماشینلاری ایداره بناسینا یاخین قویمورلار، فقط باشقانلار فرقلیدیلر! اونلار باهالی ماشینلارینی یاخینا گتیریب پارک ائدیرلر! امکداشلار دئییر، شوشه لی ایداره ده کؤلگه ده تبعیض وار!! هی پاداش آلیرلار معلوم اولمور نییه؟! بو ایداره نی چاپان فقط بو آلتی مودوردو!! IT، اینسانی، مالی، فنی، تاسیسات و ایداره باشقانینین اؤزو. جلال بی دئین کیمی مودورلرین هره سیده بیر میللت وکیلینین تاپیشردیغیدی، شیخ اوغلونودا باشکند قویوب و اورانین راضیلیغین گرک ساخلاسین! بو ایداره ده لاپ کیچیک مسئول اولماغادا گره ک تانیشین اولسون و ائله آداملاری مسئول قویورلار کی، یوخاری رئیسلردن سؤز ائشیدیب هر سؤزونه هن دئسین! بوتون ایش بیلن آداملار قیراقدادی، هره سینه ده بیر آد تاخیبلار!!"

شوشه لی ایداره نین باشقانیندان بیرینی جلال دئدی، بیرینیده قهرمان دئدی. بونلاری ائشیتدیکجه تاریوئردی شیخ اوغلونو داها آرتیق تانیییب، یازیغین یامان اوره یی سیخیلیردی. هردن صندلیندن دوروب پنجره قاباغینا گئدیردی و بؤیوک شهرله قارشیداکی قیرمیزی داغلارا باخا-باخا خیاللارا دولوب گؤزلری ایسلانیردی.

تاریوئردینین آتا-آناسی، بالا شهره قاییتماغی اوچون یالواریب گل سنی تازادان ائولندیرک دئییردیلر. آمما تاریوئردی بیلیردی آنا یوردوندا اونونلا قورومساق کیمی داورانیب بو روسوایچیلیغین باش وئرمه سینده اصلی تقصیرلی اونو بیله جکلر! جلال ایله قهرمان بو قونودا، ایشینی باشکند آلماغی و آپارتومانینی ساتیب اورادا رهن پولو حاضیرلاماغی مصلحت بیلیردیلر و باشکندده هر کیم ایتر-باتار آنجاق گئچینر سؤیله ییردیلر. تاریوئردی ایسه بونلاری توتوشدوراندا تجروبه لی امکداشلارین اؤنریسینی بینیردی. او بایرام یاخینلاریندا، شیخ اوغلو اوزاق چینه مامویته گئدیرم دئمیش، آمما یاخین تورکییه یه گئتمیشدی! اورادا باشی آچیق جئیرانلا قوشا گزنده گؤرونتولنیب سوسیال مئدیادا یاییلمیشدی. بایرامدان اوچ آی گئچنده، تاریوئردی باشکندده داشیندی. اوندان نئچه گون سونرادا خبر یاییلدی کی، باشقان خئیران و بالاجا اوغلویلا بیرگه آمئریکایا قاچیب! کیملرین یاردیمییلا بللی اولمادی، آنجاق هر بوجاغی کونترول آلتیندا اولان شوشه لی ایداره نین باشقانی، اؤلکه دن اوتوز میلیون دولار چیخاردیب بیر عؤمر دوشمن سسله دییی آمئریکایا آپارمیشدی!! جئیرانی ایسه، شیخ اوغلونون اورتاغی عونوانیندا بؤیوک شهرده یاخالاییب دوستاقلامیشدیلار!! تیلویزیون داها شیخ اوغلونو گؤسترمیردی. بیر باشقاسی شوشه لی ایداره ده شیخ اوغلونون یئرینه گئچیب اونون سؤزلرینی تیکرارلاییردی. یئنی افندینین گئچمیشی ایسه اؤنجه کینه اوخشار ایدی.

پرسونئل: کارگزینی

آرشیو : بایگانی

قورا پیشیرن: تیر

قویروق دوغان: مورداد