+0 به یه ن
(حیکایه، اوچونجو ایبتیدایی ایلین فارسجا اوخویالیم کیتابینین، ایران خوروزو حیکایه سی آدلی درسیندن قایناقلانیب)
بایرام گونو ایل شوعاری، "ایران مالیندان حیمایت" دئیه سسلنمیشدی و آمئریکا تحریملرینده اولان اؤلکه نین چتینلیکلری خالقلا اورتایا قویولوب، اورانین آنا سورونون ایقتیصاد اولدوغونا دؤنه لرله وورغو یاپیلمیشدی. بئله اولدوقدوا اوندان بری، اؤلکه سوروملولاری هر دانیشیقدا یئرلی-یئرسیز شوعارا توخوناراق، خالقی یابانجی جینسی یوخ بلکه ایران مالی آلماغا چاغیریردیلار. حتتی مدرسه لرده بئله شوعار حاققیندا گؤزل-گؤزل سؤزلر سؤیله ییردیلر. بونونلا بئله سؤزدن عمله گلنده، سوروملولاردان سورونلارا گؤره گره کن تدبیر گؤرونموردو! او ایل، سوروملولار باشقا سورونلاری گیزلتمه یی آز-چوخ باشارسالاردا، ایقتیصاد مسئله سینده کی تدبیرسیزلیکلری اؤرت-باسدیر ائتمک مومکون اولماییردی. جینسلرین آمئریکا دولاریلا گوندم باهالاشمالاری اولوب، هر کیم ساتدیغی مالا سئودییی قییمتی قویوردو. بو دورومدا ایقتیصاد مسئوللاری غورورلا جینسلر تئزلیکله اوجوزلاشجاق دئییردیلر، آنجاق صؤحبتلرینین همن آردینجا جینسلر داهادا آرتیق باهالاشیردی. ایران خالقی ایسه یوخسوللاشیب هئچ یان مالی آلا بیلمیردی.
او ایل عرضینده، تبریزده شاه گؤلو پارکینا یاپیشان دؤولتی اوغلان مدرسه سینده، "ایران مالیندان حیمایت" شوعارینا گؤره مودور آیدا بیر دؤنه ییغینجاق قوروب اؤیرتمنلره سؤزلر تاپیشیریردی. اؤیرتمنلر ایسه شوعاری گونده، چوخو یوخسول شمس آوا بؤلگه سیندن گلن اوغلانلارا وورغولاییب، مملکت کرخانالارینین دولانماغی اوچون عاییله لرینین اؤنملی وظیفه لرینی خاطیرلادیردیلار.
او ایلین سون آیی دیبده گلیب چاتدی. آیین ایلک شنبه سینین سحر چاغیندا، اوچونجو ایبتیدایی شاگیردلری تازا کیلاسلارینا گلمیش، اوجادان دانیشماقدایدیلار. آلتی ردیفلی و هر ردیفده بئش صندلی اولان کیلاسین شاگیردلری، چانتاسی الینده اولان خانیم اؤیرتمنلری قاپینی آچارکن، سوسوب آیاغا قالخدیلار و آیاق اوسته اؤیرتمنلرینه گون آیدین دئییب سلاملادیلار. قارا پالتارلی-قارا مقنعه لی یاشلی اؤیرتمن، قاباقداکی سکییه چیخیب گولومسه یه رک سلاملارین جوابینی وئریب، شاگیردلرین صندللرینده اوتورماقلارینا ایجازه وئردی. اؤیرتمن چانتاسیندان آچار چیخاردیب، گئچیب کیلاسداکی اؤزل کومودونو آچدی و اورادان دفتر ایله فارسجا اوخویالیم کیتابینی گؤتوردو. پنجره طرفینه گئدیب، دفتر، کیتاب و چانتانی ماساسی اوستونه قویوب صندلینده ایلشدی. سامسونگ مارکالی موبایلینی تورکیه دن آلدیغی چانتادان ائشیگه چیخاردیب صفحه سینه باخدی و اونو ماسا اوستونه قویدو. خانیم، دفتری آچدیقدا شاگیردلری بیر-بیر حاضیر-غاییب ائتدی. سونرا، سسینی ده ییشیب، "اوشاقلار فارسجا اوخویالیم کیتابیزی آچین!" دئدی و آیاغا قالخدی. بیر گؤی بویالی ماژیکی آچیق کوموددان گؤتوروب، "ایران خوروزو حیکایه سی" سؤزلرینی خوش خطله اؤنده کی آغ تاختادا یازدی. بوگونون درسینین آدیدیر دئیه رک، درسین کیتابداکی صفحه سینیده سؤیله دی. شاگیردلر، کیتابلارینداکی صفحه نی آختاریب تاپیب درسه حاضیرلاشدیلار. او زامان، خانیم اؤیرتمن یئنیدن گلیب یئرینده ایلشدی. کیتابی گؤزونون قاباغینا چکدی و نازیک سسینی آلچاق-اوجا ائدرک، ایران خوروزو درسینی اؤیرتمه یه باشلادی:
اسکی زامانلاردا، ایران ایله اؤلکه لرین بیری آراسیندا ساواش دوشدو. دوشمن اوردو باشی، ایران اوردو باشینین یانینا گلدی. او اؤزویله بیر دولو توربا داری گتیرمیشدی. ایران اوردو باشینین گؤروشنه گئتدیکده، توربانین باشینی آچدی و داریلاری یئره سپله دی و دئدی: "بیزیم ساواشچیلاریمیز بو داری دنلری کیمی چوخدورلار و آز موددتده سیزه حمله ائده جکلر." ایران اوردو باشی بو صحنه نی گؤرنده، بیر آز دوشوندو و بویروق وئردی، بیر خوروز گتیردیلر و داریلارین قیراغینا اؤتوردولر. خوروز آنیندا داریلاری دنله مه یه مشغول اولدو. ایران اوردو باشی دوشمن اوردو باشینا اوز توتدو و دئدی: "گؤردون کی ایران خوروزو نه سیزین داریلارنیزین باشینا گتیردی!"
اؤیرتمن درس قورتولاندا ماراق ایله اوشاقلارا بیر گؤز دولاندیردی، آنجاق اونلارین اوزلریندن درس یاراتماق ایسته دیی حیسسی آنلایانمادی. فیکر ائتدی کی، اوشاقلار درسدن هئچ بیر شئی دوشنمه دیلر. بونونلا بئله تکلیف ائتدی: "اوشاقلار، صاباحا کیمی یاخشی فیکیرلشین، مشورتده ائله یین و فارسجا یازالیم کیتابینیزدا یازین کی، ایران اوردو باشی ندن خوروزو داریلارین اوستونه بوراخدی!؟" اؤیرتمن تکلیفه بیرده وورغو یاپدیقدان سونرا، کؤنوللو اوشاقلاردان درسی تیکرار اوخوماقلارینی ایسته دی. اوشاقلار درسی اوخوماقدا، اؤیرتمن پنجره دن حیطده پارک ائتدییی پئژو آراباسینی یوخلادی. اورادان، بیر آز شاه گؤلونون قیش گؤرکمینه باخیب، ایشلرینه ده فیکیرلشدی. اوتوروب موبایلینده فیلتئر سیندیرانی چالیشدیریب، تئلگراما گئتدی.
هفته ایکیسی گونونون اوول ساعاتیندا، شاگیردلر فارسجا یازالیم کیتابلارینی آچدیلار. اؤیرتمن یئریندن، دونه نین تکلیفینی هامی سیرایلا اوخویاجاق دئییب، پنجره یانینداکی اوغلانین باشلاماسینا ایشاره ائله دی. اوول سیراداکی بئش شاگیردین هره سی بیر-ایکی جومله ده ایران اوردو باشینین تدبیرینه، قورخمامازلیغینا و زیرکلییینه، هابئله ایرانین ظفر قازاناجاغینا یازدیقلاریندا ایشاره لر ائدیب، اؤیرتمن طرفیندن آلقیشلاندیلار. نوبت ایسه، ایکینجی سیرانین اوول نفری اولان قاراشین صدرایا چاتدی. خانیم اؤیرتمن غورورلو اوغلانین دیرلندیرمه سینی گوددو. گلجکده سوروملو اولماغی هدفله ین، آتاسی باش قیرخان اولان شمس آوا اوشاغی، ائولرینده خانیم موعللیمین ایل عرضینده ایران ماللارین فایدالاناق سؤزلرینی هی سالیب چیخمیشدی و خانیم افندینین خوشونا گلن بیر یانیت آختارمیشدی. صدرا، کیتابدا یازدیغینی اوجادان بئله اوخودو: "ایران اوردو باشی ایسته ییب، ایران مالیندان ایستیفاده ائله سین!" او یوبانمادان، "خانیم!" کلمه سینی جوابینا اکله ییب، ساکیت-ساکیت موعللیمه باخاراق دیرلندیرمه سینی گوددو. شاگیردلر نومره لری آشاغی اولان آمما اؤزونه چوخ گووه نن کیلاسداشلارینین جوابینی ائشیدرکن، آلتدان گولمه یه باشلاییب خانیم اؤیرتمنین نه دئیه جه یینی گؤزله دیلر. خانیم اؤیرتمن نئچه لحظه یئرینده دونوخاراق قالدی. گولمه یینی ساخلاماق ایسته ییردی، آنجاق ساخلایانماییب گؤرونمه میش شکیلده بیردن اوجادان گولدو! اوندا اوشاقلارین گولوش سسلری قووزانیب شاه گؤلوده ائشیدیلدی. اؤیرتمن کیلاسین الیندن چیخدیغینی گؤروب، حالی ده ییشیلدی. قیوراق آیاغا دوردو. مقنعه سینی برکیدیب، حیرصله، "ساکیت اولون!" دئیه رک کیلاسی سوسدوردو. سونرادا صدرانین ساغینداکی شاگیرده سن اوخو دئدی.
درسی کیتابلاردا، ایرانین اسکی زامانلارداکی مسئوللارینی، ایران خوروزو درسینده اولدوغو کیمی، هوشلو، چوخ زیرک و ایش بیلن یازیریلار. آنجاق بللی دئییل، ندن ایرانین بوگونون غورورلو سوروملولاری بابالاریندان تدبیر اؤیرنمه ییب، سورون یاراناندا اورتایا ایران خوروزو بوراخمیرلار!؟