سینیق کؤرپو

(قدرت ابوالحسنی سهلان)

نه قدر فیکیرلشیردیم، بو کرخانایا گلندن بری، اربابین ائیوان دانیشیغیندان بیر خوش خبر خاطیرلامیردیم. کؤپک اوغلو همیشه مملکتین دورومو بئله دی ائله دی، دئییبدی! ایش یئریمده تئز-تئز قولاغیما چاتیر، شرق اوغلودا اؤزونه تای پوللولار سایاغی مملکتی چاپیب-چاپیب قاچاجاقدی!! اون ایلدن چوخدور،  شرق اوغلونون ماشین قطعه سی دوزلدن کرخاناسیندا یونتالامالیق ائدیرم، اون ایکی ایلده آیری یئرلرده چالیشمیشام، آنجاق بیر قیراندا بوراجان آرتیرا بیلمه میشم. شهرین یوخسول محلله لرینین بیرینده ایسه، آرواد و دؤرد اوشاغیملا بیرگه آتامدان قالان حیطده یاشاییرام.

شرق اوغلو اوچ ایلدن چوخدور، چئشیدلی باهانالارلا کرخانادا چالیشان 500 نفردن آرتیق فهله نین حوقوقونون اوچده ایکیسینی وئرمه ییبدی. بونا باخمایاراق، اربابین ایلین سون شنبه سی ائیواندا خوش سؤزلری اولاجاق خبری یاییلاندا، منده بوتون ایشچیلر کیمی اولدوقجا سئوینیب گلجه یه اومودلاندیم. هفته ایکیسینین اوول ساعاتلاری خبر یاییلیدی، مملکتده کی توررومه گؤره، گلن ایل آیلیقلار آزی ایکی قات آرتاجاق! هابئله دئییردیلر، شرق اوغلو کرخانا یانینداکی قورو یئرلریندن، هره یه ایکی یوز مئترمربع یئر آییریب وئره جک! یئر پولونون ایلک قیسطینی بیزه اولان بورجوندان حئسابلایاجاق، قالانیندا قیسطیلا آیلیقلاردان چیخاجاق!!

ائیوان خبری یاییلاندان سونرا، وضعیتدن بئزمیش ایشچیلر ایشلرینه گیریشدیلر و تازادان شرق اوغلو کرخاناسینی منیمسه میش اولدولار. او نئچه گونده، ایشچیلر شنلیکله فقط اربابین خوش خبریندن دئییب، قورو یئر حاققینداکی تاسارلارینداندا سؤیله ییردیلر. تکجه بونو دئییم کی، منده گئجه–گونوز گؤزل مکاندا یئرلشن یئریمه فیکیرله شیردیم و او هفته منه عؤمرومون ان اوزون هفته سی اولدو.

دیبده وعده گونو گلیب چاتدی. شنبه سحر ساعات اونا  20 دقیقه قالان، ایش داشلاریملا بیرگه، کرخانانین فوتبال مئیدانیجان اولا بیلن محوطه سینه دوغرو یولا دوشدوک. سالونلارلا اوتاقلاردان دسته-دسته چیخانلارین هامیسینین مقصدی، همن مئیدانی ایدی. اونا 10 دقیقه قالان مئیدان چاتیب، یولدشلارلا بیرگه بیر اویغون مکاندا دایاندیق. او تاریخه کیمی، مئیداندا بئله ییغیجاغی خاطیرلامیردیم. شاد ایشچیلر گوروه-گوروه بیر-بیرلریله اوجادان قونوشاراق اربابین ائیوانا چیخماسینی گؤزله ییردیلر. نهایت، اونو ایکی-اوچ دقیقه گئچمیشدی کی، شرق اوغلو قورونان دالی اوتاقدان ائیوانا چیخدی. دالیسجا چیخان ایکی اوجا بوی کیشی آغانین ساغیندا اولاراق، ایکیسیده سولوندا یئر آلدیلار. مئیدان سوسوب ائیوانا ماراقلاندی. دالبادال اوچ صلوات چئویریلدی و قارا گؤزلوکلو ارباب، ایکی قدم گؤتوروب سس اوجالدانین آرخاسینا گئچدی.

ارباب، همیشه کی کیمی اوولده، عزیز ایشچیلرین داها بیر دؤنه ده ییغیجاغیندا اولماغیندان اولدوقجا موتلو اولدوغونو سؤیله دی. سونرا ایشچیلر یاشاییشینا یئتیشمه یی سوروملولارین گره کن گؤروی بیلدی. اوندا مئیداندان، "یاشاسین، یاشاسین!" هارایی ائشیدیلدی. شرق اوغلو آردیندان، اؤلکه نین آغیر دورومدا اولدوغونو سؤیله یبب، خالقین مسئوللار یانیندا اولماغی واجیب بیلدیردی. ائیواندان گونون اصلی سؤزونه گئچمک ایسته ینده، مئیدانین ماراغی اولدوقجا آرتدی. ارباب اینام و صمیمیتله بویوردو: "هر اینسانین بیر آبیرلی و گلیرلی ایشی اولسا، نه قدر گؤزل اولارها، نه قدر گؤزل اولارها!! هره بیر گؤزل یئرده یاشاییرسا، نه قدر یاخشی اولارها، نه قدر یاخشی اولارها!!" بو سؤزلر ائیواندان گلنده توم مئیدانی شنلیک بورودو. بو سفر، "یاشاسین، یاشاسین!" هایخیریسی توم مئیداندان یوکسلدی. اربابدا ساغ الینی قووزاییب مئیدانا ساری ترپتدی و تشککورلر  ائتدی. شرق اوغلو، داغ لیواندان سو ایچدیکده، سؤزلرینی بئله داواملادی: "بونلار یاخشیدی، آمما دؤولت بیز کرخانا دولاندیرانلاری دستکله میر کی!؟ بیزده سیزین بوینوموزداکی حاقلاریزی اؤده یه بیلمیریک. بیزده سیزه یئتیشه بیلمیریک کی، سیزینده گلیرلی ایشیز اولوب گؤزل یئرلرده یاشایاسیز! آلله شاهیددی، من کرخانا دولادیرماقدان بئزمیشم! عزیزلر، ایکی آیاجان اؤزوزه ایش تاپین، من بو کرخانانی ساتاجاغام. سیزی  آللاها تاپیشیردیم!"  اود قویان خبرلر ائیواندان یاییلدی، اؤفکه لی اعتراض هارایلاری مئیداندان قالخدی. ارباب تلم- تله سیک ائیواندان اکیلدی. هر طرفدن بو سؤزو ائشیدیردیم، اسکیک کؤپک اوغلونون خوش خبری بو ایمیش ها!!

ایندی او جریانلاردان ایکی ایلدن چوخ سوووشوبدو. شهرین هر بیر یئرینه باش چکمیشم، ایش یوخدو دئییبلر. هامینین وضعیتیده ائله منه تایدی. بو موددتده بیز ۵۰۰ نفر،  سؤزوموزو بیر یئره چاتدیرا بیلمه ییب، بیر ایش گؤره بیلمه میشیک. آنجاق شرق اوغلو، کرخاسینی، یانینداکی قورو یئرینی و باشقا ماللارینی ساتا بیلدی و پوللارینی دولارا چئوریب عاییله سیله بیرگه مملکتدن اکیلیب گؤزل کانادایا قاچدی.