شاه گؤلو پارکیندا

+0 به یه ن

آخشام چاغی پارکینگ طرفیندن شاه گؤلو پارکینین اصلی آلانینا گئتمک ایسته ینده، تعججوبله اورانی عادی گونلردن داها قالابالیق گؤردوم. گؤره سن بوگون نه باش وئریب دئیه، ماراقلاناراق ایرلیله دیم. ایچینده بیر بؤیوک گؤل یئرلشن دؤرد بوجاقلی آلانین پارکینگه یاخین بوجاغیندا، گنج اوغلان-قیزلار شمع یاندیرماغا مشغول اولاراق موبایللاریلا ایشلریندن فیلم چکمکده ایدیلر. ییغینجاغا یاخینلاشیب قیراقداکیلارین بیریندن قونونو سوروشدوقدا، آدی اوندایاجان قولاغیما دیمه میش "مورتضا پاشایی" نین دونیادان گئتدییینی آنلادیم. دئمک، گنجلر اونون حؤرمتینه توپلاشمیشدیلار. اورادان سوووشاراق، دوز گئدرکن حاصارلی گؤلون بویونو سئچیب بیر ساعاتجان چکن گوندم وردیشیمی باشلادیم. گوندم وردیشیم ایسه بئش دفعه گؤل چئوره سینه دولانماق ایدی. مورتضا پاشایینین کیم اولا بیله جه یینی دوشونه رک او یان-بو یانا گئدنلر ایچینده یئریدیم. گؤلون اورتاسیندا تیکیلمیش تاریخی بینانین توشونا نئچه آتدیم قالیردیم کی، بیر دسته الی باتوملی مامورون قارشیدان گلمکلرینی گؤروب، ییغینجاغی هدفله مه لرینی ظن ائدیب بیر آز هؤووشنه یه دوشدوم. قرارا گلدیم کی، منه تای گؤل دؤوره سینه دولانان آداملارین بیریندن پاشایی باره سینده یوبانمادان بیلگی توپلاییم. بئله جه، ایلک اویغون فورصتی آرادیم. لونا پارکا چاتیب، ساغا دؤندم. گؤلون ائنینین اورتالاریندا، تک باشینا قدم ووران بیر قیوریق توکلی اورتا یاش کیشی منیم دیققتیمی چکدی. آرخادان اونا یئتیشیب سلاملاشدیقدا دئدیم: "چوخ-چوخ باغیشلایین موزاحیم اولدوم، بیر سئوالیم وار ایدی! سیز بیلیرسیز مورتضا پاشایی کیمدی؟!" قیوریق توکلی کیشی هیزینی آزالداراق باشینی دؤندریب دیققتله منیم اوزومه باخادی، سونرادا، "خواننده دی!" دئدی. سوروشدوم: "آشیقدی یوخسا تورکجه اوخویاندی؟" آجی گولومسه ییب، "یوخ بابا موطوروفدو!!" دئدی. کیشی نئچه لحظه دینمه ییب الی ایله ییغینجاغا ایشاره ائله ییب سؤیله دی: "بعضی تورکلری گؤرورسن دا، اؤزلرینه شمع یاندیرمازلار، آنجاق فارسلارا یاندیرارلار!! بونلار فارسلاری اؤزلریندن آرتیق بیلیب، اونلارا بئله اؤزلرینی گؤستررلر!! بونلار دئیرلر سیز بیزی آدام بیلمه سزده، بیز سیزدن اؤترو اؤلوروک!!" ... گؤلون باشقا بویونا چؤننده، اوراداکی پیلله لرله خییاوانا دوشوب گئتمک ایسته ین قیوریق توکلی کیشیدن تشککور ائدیب ساغ اوللاشدیم. سونرا، بیر آز هیزیمی آرتیردیم. فیکیرلی-فیکیرلی گلیب گؤلون باشقا ائنینه گئچدیم و قارقالار بوللو یووالار سالمیش اوجا آغاجلارین آلتیندان سوووشوب یئنیدن گنجلر ییغینجاغینا چاتدیم.

او پاییز آخشامی، داها دؤرد دؤنه گؤل چئوره سینه یئریدیییمده، هر آتدیمدا گنجلرین ایشلری و  قیوریق توکلی کیشییله اولان قیسسا دانیشیغیمیزا فیکیرلشیردیم. اؤزللیکله اؤلکه توپلوملاریندا اسکیکلیک و آرتیقلیق حیسسلرینین هارالاردان یارانمالارینی درین-درین آختاریردیم. دوشونوردوم، چئشیدلی توپلومو اولان بیز یاشایان اؤلکه ده اوولجه جور به جور (دینسل، کولتورل، بؤلگه سل و توپلومسال) گیزلی-آشکار تبعیضلرین بیناسینی قویورلار. سونرا الده اولان مئدیالارلا تبلیغاتلار آپاریب، نتیجه ده بعضی توپلوملاردا اسکیکلیک، بعضیسینده ده آرتیقلیق حیسسینی یارادیرلار.بئله جه اسکیکلیک حیسسی اولانلاری آرتیقلیق حیسسی یارانان توپلومدا آسیمله اولماغا حاضیرلاییرلار.هر حالدا، هر دفعه گلیب گنجلره چاتاندا، ییغیجاغینین آرتدیغینا و مامورلارین آرامجا کناردان نظارت ائتمکلرینه شاهید اولوردوم. نهایت، وردیشیم قورتولوب گلدیییم یئردن قاییتماق ایسته دیم. آنجاق، مورتضا پاشاییدان آرتیق بیلگی آلیم دئیه، گنجلر ییغینجاغینا بیرده یاخینلاشدیم. شمعلر یاناراق، قیز-اوغلان بیرلیکده غملی-غملی فارسجا ماهنیلار اوخویوردولار. او حینده، یاخیندا دورموش اوزون توکلرینی دالیدان بوغموش چاتما قاشلی بیر گنجدن ماهنیلاردان سوروشدوم. اودا اوخوماقلارین پاشایینین اؤز ماهنیلاریندان اولدوغونو دئدی. اوغلاندان مورتضا پاشایینین کیم اولدوغونو سوردوم، دویغولاناراق موبایلیندا عکسلر گؤستریب اونا گؤره منه بیلگیلر وئردی. سرطان ساغلیغینی پوزموش، اوتوز یاشیندا دونیاسینی ده ییشمیش مورتضا پاشایی، فارس دیلینده پاپ اوخویانلارین لاپ چوخ سئویلنلردن بیری ایدی و آجی طالعلی اوخویانین ایتگیسیندن بوگون بوتون اؤلکه ائتگیلنمیشدی. منیمده پاشایییا یازیقلیغیم گلدی. کدرلنیب توکلرینی دالیدان بوغموش اوغلانا کئشکم بئله تئز سولمایایدی دئییب، اوندان ساغ اوللاشدیم. هر گوندن گئجیکمیش اولاراق شاه گؤلو پارکیندان چیخیب اورادان آز فاصیله ده اولان ائومیزه دوغرو دؤندوم. 



  • [ ]